रामेछाप । उद्योग तथा वाणिज्य कार्यालय मन्थलीको नेतृत्वमा विभिन्न निकायको संयुक्त टोलीले मन्थली बजार, सोमवारे हाट र लिखुतामाकोसी गाउँपालिका–५ धोवि बजारमा उद्योग तथा पसलहरूको अनुगमन गरेको छ ।
अनुगमनमा खाद्य प्रविधि तथा गुण नियन्त्रण डिभिजन कार्यालय सिन्धुली, हेटौंडा, नेपाल गुणस्तर तथा नापतौल विभाग जनकपुर, जिल्ला प्रशासन कार्यालय रामेछाप, मन्थली नगरपालिका, उद्योग वाणिज्य संघ, पत्रकार महासंघ, होटल व्यवसायी संघ र जिल्ला प्रहरी कार्यालयका प्रतिनिधिहरू सहभागी थिए ।
तीन स्थानमा गरिएको अनुगमनमा मन्थली बजारका ५१, सोमवारे हाटका ४ र धोवि बजारका १४ गरी कुल ६९ पसल तथा उद्योग जाँचिएको थियो ।
अनुगमनका क्रममा मन्थलीस्थित सुनापति वेकरीलाई सरसफाइ र व्यवस्थापन कमजोर देखिएकाले १० हजार रुपैयाँ जरिवाना गरिएको छ । अमृत दुग्ध डेरीलाई सरसफाइ सुधार गर्न निर्देशन दिँदै १ हजार रुपैयाँ जरिवाना गरिएको हो । अन्य डेरी, वेकरी तथा विभिन्न पसललाई व्यवस्थापन सुधारका लागि चेतावनी दिइएको छ ।
धोवि बजारमा भने गम्भीर कैफियत भेटिएको छ । बुढाथोकी किराना स्टोरलाई लेबल नभएको सामान बिक्री, म्याद नाघेको खाद्यान्न राख्ने र विषादी प्रयोग गरेको कारण १० हजार रुपैयाँ जरिवाना गरिएको छ । सानु किराना स्टोरलाई २ हजार र आरके खाद्यान्न स्टोर्सलाई नापतौल त्रुटि भेटिएकाले २ हजार रुपैयाँ जरिवाना गरिएको छ ।
अनुगमनका क्रममा म्याद नाघेका चिउरा, चियापत्ति, दालमट, बिस्कुटलगायत पाँच हजार रुपैयाँभन्दा बढी मूल्यका खाद्य सामग्री तत्काल नष्ट गरिएको छ ।
अनुगमन निरीक्षण अधिकृत खेमराज घिमिरेले सुधार नगरी दोहोरिएमा उद्योग वा पसल नै बन्द गर्ने चेतावनी दिनुभयो । हालसालै गरिएको यो संयुक्त अनुगमनलाई स्थानीय तह, उद्योगी–व्यवसायी र उपभोक्ताले समेत सकारात्मक रूपमा लिएका छन् ।
