१० भदौ, काठमाडौं । वीरगञ्जमा हैजाको प्रकोप बढ्दै गएको छ । राष्ट्रिय जनस्वास्थ्य प्रयोगशालामा गरिएको परीक्षणमा प्राप्त १० नमुनामध्ये ८ वटामा हैजा पुष्टि भएको प्रयोगशालाका प्रमुख डा. रञ्जन भट्टले जानकारी दिए । बाँकी दुई नमुनाको नतिजा भोलि आउनेछ ।
डा. भट्टका अनुसार ८० प्रतिशतभन्दा बढी नमुनामा संक्रमण देखिनुले हैजा समुदायस्तरमै फैलिएको संकेत गरेको छ ।
पर्सा जिल्ला जनस्वास्थ्य कार्यालयका अनुसार शुक्रबारदेखि अहिलेसम्म वीरगञ्जका विभिन्न अस्पतालमा झाडापखाला र हैजाका ३९१ जना बिरामी भर्ना भएका छन् । तीमध्ये १७१ जना उपचारपछि डिस्चार्ज भए पनि अझै २२० जना बिरामी विभिन्न अस्पतालमा उपचाररत छन् ।
सबैभन्दा बढी बिरामी नारायणी अस्पतालमा रहेका छन्, जहाँ १०६ जना उपचाररत छन् । तराई अस्पतालमा ३३, नेसनल मेडिकल कलेजमा ३१, वीरगञ्ज हेल्थ केयरमा २० तथा अन्य अस्पतालमा थोरै संख्यामा बिरामी भर्ना छन् ।
अहिलेसम्म २४ जना बिरामीलाई आईसीयूमा र ६ जनालाई एचडीयूमा राखेर उपचार भइरहेको छ । वीरगञ्ज हेल्थकेयर र तराई अस्पतालमा क्रमशः ९ र ८ जना आईसीयूमा रहेका छन् ।
सोमबार दिउँसोदेखि मंगलबार बिहानसम्म मात्रै थप ९५ जनामा हैजाको संक्रमण पुष्टि भएको छ । नयाँ संक्रमितमध्ये नारायणी र तराई अस्पतालमा ३२/३२ जना, नेसनल मेडिकल कलेजमा १३ जना तथा अन्य अस्पताल र प्याथोलोजी केन्द्रहरूमा केही संक्रमित थपिएका छन् ।
