मेरो प्रदेश डेक्स
मन्थली, भाद्र ९
रामेछापको मन्थली नगरपालिका जिल्लाकै पहिलो बालमैत्री स्थानीय शासनयुक्त नगर घोषणा हुने भएको छ । २०७९ देखि सुरु गरिएको अभियान अन्तर्गत सम्पूर्ण सूचकहरु पूरा भएपछि आगामी बुधबार पालिकालाई बालमैत्री घोषणा गर्न लागिएको हो ।
पालिकाको १४ वटै वडालाई बालमैत्री घोषणा गर्दै आवश्यक पूर्वाधार र अधिकार सुनिश्चित गरेपछि मन्थली नगरपालिकालाई बालमैत्री घोषणा गर्न लागिएको नगर उपप्रमुख इश्वरी बस्नेतले बताइन् । उनका अनुसार बाल बचाउ, बाल संरक्षण, बाल विकास र बाल सहभागिता सहितका सबै क्षेत्र तथा सूचकहरुमा काम गरेपछि प्रदेश सरकारबाट स्वीकृति प्राप्त भएसँगै पालिकालाई बालमैत्री घोषित गर्न लागिएको हो । उपप्रमुख बस्नेतले लामो अभियान र तयारीपछि यो अवस्थामा सम्म आइपुग्दा खुसी व्यक्त गर्दै यसको दिगोपनाका लागि निरन्तर काम गरिने बताइन् ।
संविधान प्रदत्त बाल अधिकारको सुनिश्चिततासँगै बालमैत्री घोषणा गर्दै दिगो विकासका लक्ष्य प्राप्तिका लागि पालिका अगाडी बढिरहेको उनले बताइन् । गत आर्थिक वर्षको जेष्ठ मसान्तमै पालिकालाई बालमैत्री घोषणा गर्ने तयारी गरिएकोमा प्राविधिक कारणले सम्भव नभएपछि चालु आर्थिक वर्षको सुरुवातमै घोषणा गर्न लागिएको पालिकाले जनाएको छ ।
जिल्लाको पहिलो बालमैत्री नगर बन्ने प्रतिस्पर्धामा मन्थली नगरपालिका पहिलो भएको हो । रामेछाप नगरपालिका पनि २१ गते बालमैत्री घोषित हुने तयारीमा रहेको छ । अन्य बालिकाले पनि बालमैत्री अभियानहरु सञ्चालन गरिरहेको जिल्ला समन्वय समिति रामेछापले जनाएको छ ।
