मेरो प्रदेश डेक्स
मन्थली, भाद्र ७
रामेछापको सदरमुकाम मन्थलीमा शनिबार महिला आन्दोलन तथा तिज विषयक अन्तरक्रिया कार्यक्रम सम्पन्न भएको छ । शुभकामना आदानप्रदानसँगै महिला आन्दोलनबारे सचेतना प्रवाह गर्न प्रेस चौतारी नेपाल, जिल्ला कमिटि रामेछापले आयोजना गरेको सो कार्यक्रम सम्पन्न भएको हो ।
कमिटिका अध्यक्ष लेख बहादुर बिकको अध्यक्षतामा भएको सो कार्यक्रम नेकपा एमाले रामेछापका अध्यक्ष पुरुषोत्तम कडरियाले ब्यानर पढेर उद्घाटन गर्नु भएको थियो । सो अवसरमा उहाँले नेकपा एमाले सधै महिलाको मुक्ति र समनताको पक्षमा रहेको उल्लेख गर्दै सबै पार्टीले राजनीतिमा पनि महिलालाई समान अधिकार दिइनु पर्ने बताउनु भयो । उहाँले महिला पुरुष समान भन्ने कुरालाई मध्यनजर गरी तिजमा पनि पुरुषहरुले नाच्ने, दर खाने कार्यक्रममा सहभागी हुने गरेको बताउँदै अब पुरुषहरुलाई व्रत पनि बस्न सुझाव दिनु भयो ।
कार्यक्रममा मन्थली नगरपालिकाकी उपप्रमुख ईश्वरी बस्नेतले मनोरञ्जनका नाममा तीजलाई भड्किलो बनाउन नहुने बताउनु भयो । उहाँले तीजको मर्म बिनाका व्यवसायिक र उत्ताउला गीतहरु मात्रै आइरहेका प्रति चिन्ता व्यक्त गर्दै कलाकारहरुले यसमा ध्यान दिनुपर्ने उल्लेख गर्नु भयो । तिज केबल मनोरञ्जनको पाटो नभई आन्दोलनको स्वरुप पनि रहेकाले महिलाले आफ्ना हकअधिकार सुनिश्चिताका लागि आन्दोलनलाई सशक्त बनाइनु पर्ने बताउनु भयो ।
कार्यक्रममा एमाले रामेछापका सचिव प्रकाश कुमार कार्की, उपसचिव मिलन कुमार घिसिङ, नेपाल पत्रकार महासंघ केन्द्रीय सदस्य नवराज पथिक, एमाले रामेछापका प्रचार तथा प्रकाशन विभाग प्रमुख राकेश श्रेष्ठ, प्रेस चौतारी रामेछापका इन्चार्ज मदन खड्का लगायतले शुभकामना व्यक्त गरेका थिए । कार्यक्रममा अन्तरक्रिया कार्यक्रम पश्चात् मन्थली नगरपालिकाकी उपप्रमुख बस्नेतले तिज गीतप्रस्तुत गरेसँगै सांस्कृतिक कार्यक्रमको सुरुवात भएको थियो । कार्यक्रममा नाचगान, शुभकामना आदानप्रदानसँगै दर खुवाइएको प्रेस चौतारी रामेछापले जनाएको छ ।
