पर्सा । चालु आर्थिक वर्षको पहिलो महिना साउनमा वीरगञ्ज नाकाबाट आयात र निर्यात दुवै बढेका छन् । वीरगञ्ज भन्सार कार्यालयका अनुसार यस अवधिमा रु ६८ अर्ब १७ करोड मूल्य बराबरका वस्तु तथा सामान आयात भएका छन्, जुन अघिल्लो वर्षको तुलनामा रु ८ अर्ब ११ करोडले बढी हो ।
गत वर्षको साउनमा रु ६० अर्ब ६ करोडको सामान आयात भएको थियो । यसैगरी, निर्यात पनि उल्लेखनीय रूपमा वृद्धि भएको छ । चालु वर्षको साउनमा रु ८ अर्ब ४५ करोडको सामान विभिन्न मुलुकमा पठाइएको भन्सार कार्यालयले जनाएको छ । गत वर्षको सोही अवधिमा निर्यात रु ३ अर्ब ५ करोड मात्रै थियो ।
आयात–निर्यातसँगै राजस्व संकलन पनि बढेको छ । भन्सार कार्यालयका अनुसार चालु आवको साउनमा रु १८ अर्ब ४४ करोड राजस्व संकलन गरिएको छ, जुन अघिल्लो वर्षको सोही अवधिको तुलनामा झण्डै रु २ अर्ब ५२ करोड बढी हो । गत आवको साउनमा रु १५ अर्ब ९२ करोड मात्र राजस्व संकलन भएको थियो ।
