रामेछाप । नेपाली महिलाहरूको महान पर्व हरितालिका तीजको अवसरमा रामेछाप जेसीजको आयोजनामा ‘रामेछाप तीज क्वीन २०८२’ तथा सांस्कृतिक कार्यक्रम भव्यतापूर्वक सम्पन्न भएको छ ।
कार्यक्रमको उद्घाटन पूर्व ऊर्जा, जलस्रोत तथा सिँचाइ राज्यमन्त्री तथा नेपाली कांग्रेस रामेछापका सभापति पूर्णबहादुर तामाङले गरेका थिए । कार्यक्रममा जिल्ला समन्वय समिति रामेछापकी प्रमुख चिना खड्का, मन्थली नगरपालिकाकी उपप्रमुख इश्वरी बस्नेत, रामेछाप नगरपालिकाकी उपप्रमुख बालाकुमारी कार्की, गोकुलगंगा गाउँपालिकाकी उपाध्यक्ष उषा कार्की र नेपाल पत्रकार महासंघ रामेछापका अध्यक्ष दीपक घिमिरेलगायतका अतिथिहरूको उपस्थिति रहेको थियो ।
कार्यक्रममा वक्ताहरूले तीजलाई भड्किलो बनाउने प्रवृत्ति भन्दा पनि नेपाली संस्कृति र परम्पराको संरक्षण–जगेर्नामा जोड दिनुपर्नेमा आग्रह गरे ।
रामेछाप जेसीज २०२५ का अध्यक्ष यादव केसीको अध्यक्षतामा सम्पन्न कार्यक्रममा साताव्यापी विभिन्न गतिविधिहरूको उपलब्धि तथा प्रगतिबारे पदाधिकारीहरूले प्रतिवेदन पेस गरेका थिए ।
‘रामेछाप तीज क्वीन २०८२’ मा सहभागी ११ जना महिलाहरूलाई विभिन्न विधामा सम्मान गरिएको थियो । प्रतियोगीहरूले आफ्ना कला, प्रतिभा र तीज पर्वसँग सम्बन्धित प्रस्तुति दिएका थिए ।
यससँगै स्थानीय तथा राष्ट्रिय स्तरका कलाकारहरूले गीत–संगीत, नृत्य र विविध सांस्कृतिक प्रस्तुति दिँदै कार्यक्रममा रंग भरेका थिए । महिलाहरूको उत्साहपूर्ण सहभागिता, नाचगान र तीजको दरसहित मन्थलीको माहोल झन् उल्लासमय बनेको थियो ।
आयोजक जेसीजले यस किसिमका कार्यक्रमहरूले सांस्कृतिक परम्परा जगेर्नासँगै स्थानीय प्रतिभा र महिलाको सशक्तीकरणलाई प्रोत्साहन गर्ने विश्वास व्यक्त गरेको छ ।
