जनकपुरधाम/मधेश – २०६३ सालको गौर हत्याकाण्डको छानबिन गर्न सर्वोच्च अदालतले जारी गरेको परमादेशविरुद्ध जनता समाजवादी पार्टी (जसपा) नेपालले आज पनि मधेशका विभिन्न जिल्लामा विरोध प्रदर्शन गरेको छ।
आन्दोलनकारीहरूले सर्वोच्चको आदेशलाई राजनीतिक प्रतिशोध र मधेश आन्दोलनलाई कमजोर पार्ने षड्यन्त्रको रूपमा व्याख्या गर्दै जनकपुरधामको जनकचोक, वीरगन्जको घण्टाघर, सप्तरीको राजविराजसहित विभिन्न ठाउँमा नाराबाजी गरे। प्रदर्शनमा सहभागी कार्यकर्ताहरूले ‘उपेन्द्र यादवमाथि षड्यन्त्र बन्द गर’, ‘मधेश आन्दोलनको अपमान बन्द गर’ जस्ता नारा लगाएका थिए।
सर्वोच्चले ७ चैत २०६३ मा रौतहटको गौरमा भएको हिंसात्मक घटनामा २७ जनाको ज्यान गएको घटनाको छानबिन गर्न परमादेश जारी गरेको थियो। जसपा नेपालका नेताहरूले परमादेशलाई मधेश आन्दोलनका उपलब्धिमाथि प्रहार र पार्टी अध्यक्ष उपेन्द्र यादवलाई राजनीतिक रूपमा कमजोर बनाउने प्रयासको रूपमा लिएका छन्।
विरोध कार्यक्रमका क्रममा जनकपुरधामका पूर्वमेयर लालकिशोर साहले भने, “यो कदम मधेशी जनताको आत्मसम्मान र अधिकारको लडाइँलाई कमजोर बनाउने प्रयास हो। हामी मधेशी जनताको अधिकार र सम्मानका लागि लडिरहन्छौं। यदि यो षड्यन्त्र बन्द भएन भने मधेश फेरि आन्दोलनको आगोमा बल्नेछ। त्यसको जिम्मेवारी राज्यले लिनुपर्छ।”
२०६३ मा मधेशी जनअधिकार फोरम (हालको जसपा नेपाल) र नेकपा माओवादीका कार्यकर्ताबीच भएको झडपमा २७ जनाको ज्यान गएको थियो। घटनाको छानबिनका लागि विभिन्न समयमा समितिहरू गठन भए पनि ठोस नतिजा सार्वजनिक नभएको भन्दै मधेशी नेताहरूले लामो समयदेखि असन्तुष्टि व्यक्त गर्दै आएका छन्।
जसपा नेपालको आन्दोलनले मधेश प्रदेशमा राजनीतिक तनाव फेरि बढाएको छ भने स्थानीय प्रशासन र सुरक्षा निकायले समेत प्रदर्शनको समयमा शान्ति कायम गर्न सतर्कता अपनाएका छन्।
