रामेछाप । रामेछाप हुँदै ओखलढुङ्गासम्म पुग्ने रणनीतिक महत्वको सेलेघाट–रामेछाप–साँघुटार सडक स्तरोन्नति कार्य ढिलाइ भएपछि यात्रु र सवारी साधन हैरानी खेपिरहेका बेला निर्माण कम्पनीले समस्या समाधान गर्ने प्रतिबद्धता जनाएको छ । सडकको दयनीय अवस्थाका कारण यात्रुवाहक बससहितका सवारी साधन घण्टौँसम्म बाटोमै अलपत्र पर्न थालेपछि जिल्ला प्रशासन कार्यालयको अगुवाइमा प्रदेश सभा उद्योग, पर्यटन तथा वातावरण समिति, जनप्रतिनिधि, राजनीतिक दल, सडक आयोजना कार्यालय र निर्माण कम्पनीका प्रतिनिधिबीच बैठक बसेको हो ।
बैठकमा प्रमुख जिल्ला अधिकारी श्यामकृष्ण थापाले तत्काल सडक नियमित सञ्चालन हुने व्यवस्था मिलाउन निर्देशन दिए भने समिति सभापति आनन्दकुमार श्रेष्ठले मेसिन प्रयोग गरेर भए पनि सडक सञ्चालनमा ल्याउन आग्रह गरे ।
भारतीय एक्जिम बैंकको सहयोगमा निर्माण भइरहेको उक्त सडकको ठेक्का भारतीय कम्पनी **टेलिकम्युनिकेसन इण्डिया लिमिटेड (टीसीआईएल)**ले पाएको हो । १ अर्ब ९४ करोड ७१ लाख रुपैयाँमा सन् २०२३ मे १० भित्र काम सम्पन्न गर्ने सम्झौता भए पनि तोकिएको समयमा काम नसकिएपछि फेरि १७ महिनाको म्याद थपिएको छ ।
निर्माण कम्पनीका प्रतिनिधि डी.सी. शर्माले तत्काल यातायात सञ्चालनको समस्या समाधान गर्ने र २०७९/८० मा संशोधित स्वीकृत समयसीमा अनुसार २०८३ असार ९ भित्र काम सक्ने प्रतिबद्धता जनाएका छन् । बैठकले जोखिमपूर्ण स्थानमा तत्काल मर्मत गर्न, गुणस्तरीय रूपमा काम अघि बढाउन, शान्ति सुरक्षामा सुरक्षा निकायसँग सहकार्य गर्न र सडक विभाग तथा भौतिक पूर्वाधार मन्त्रालयलाई पत्राचार गरी दीर्घकालीन समाधान खोज्ने निर्णय समेत गरेको छ ।
