रामेछाप । रामेछाप जिल्ला सहकारी संघ लिमिटेडले राष्ट्रिय सहकारी नियमन प्राधिकरणले जारी गरेको निर्देशन तथा नेपाल वित्तीय प्रतिवेदन मान (NFRS)बारे अन्तरक्रिया कार्यक्रम आयोजना गरेको छ ।
कार्यक्रममा चार्टर्ड एकाउन्टेन्ट शम्भु पौडेलले हालै जारी निर्देशिकाका प्रावधानबारे विस्तृत जानकारी दिएका थिए । उनले सहकारी संस्थाले अनिवार्य रूपमा पालना गर्नुपर्ने कानुनी तथा वित्तीय प्रक्रिया स्पष्ट गर्दै नयाँ निर्देशिका सहकारीको पारदर्शिता र वित्तीय अनुशासनलाई मजबुत बनाउन उद्देश्य रहेको बताए ।
तर, कार्यक्रममा सहभागी सहकारीका प्रतिनिधिहरूले जारी निर्देशिकामा उल्लेखित धेरै प्रावधान व्यावहारिक रूपमा कार्यान्वयन गर्न कठिन हुने धारणा राखे । उनीहरूले सहकारीहरूको भौगोलिक अवस्था, सदस्य संरचना र संस्थागत क्षमता फरक–फरक भएकाले एउटै ढाँचा सबैमा लागू गर्न चुनौतीपूर्ण हुने बताएका थिए ।
रामेछाप जिल्ला सहकारी संघका अध्यक्ष हिमाल ढुगेलको अध्यक्षतामा सम्पन्न कार्यक्रममा जिल्लाभरिका ६० भन्दा बढी सहकारीका अध्यक्ष र व्यवस्थापकहरूको उपस्थिति रहेको थियो । सहभागीहरूले सहकारी क्षेत्रलाई अझ प्रभावकारी बनाउन प्राधिकरण, संघ र स्थानीय सहकारीबीच निरन्तर संवाद आवश्यक रहेको निष्कर्ष निकालेका छन् ।
