हेटौँडा । मकवानपुरको मनहरी गाउँपालिकाले बागमती प्रदेशका मुख्यमन्त्री इन्द्रबहादुर बानियाँको स्वागतसहित तीज विशेष सांस्कृतिक कार्यक्रम आयोजना गर्ने भएको छ। गाउँपालिकाका अध्यक्ष रन्जन कालाखेतीका अनुसार भदौ ४ गते लामिटारस्थित गाउँपालिका सभाहल प्राङ्गणमा हुने कार्यक्रममा मुख्यमन्त्री बानियाँलाई औपचारिक सम्मान गरिनेछ।
प्रदेशसभा सदस्य निर्वाचित भएपछि पहिलोपटक आफ्नै क्षेत्रमा पुग्दै गरेका मुख्यमन्त्रीलाई स्वागत गर्न गाउँबासीमा उत्साह छाएको उनले बताए। महिलाको महान पर्व हरितालिका तीजको अवसर पारेर आयोजना हुने कार्यक्रममा आस्था कला केन्द्रका कलाकारहरूले मौलिक तीज गीतमा नृत्य प्रस्तुत गर्नेछन् भने अन्य सांस्कृतिक प्रस्तुति पनि हुने जनाइएको छ।
कार्यक्रममा गाउँपालिकाअन्तर्गतका विभिन्न संघ–संस्था, सहकारी, टोल विकास समिति, जनप्रतिनिधि, पूर्व जनप्रतिनिधि र राजनीतिक दलका महिला समितिका प्रतिनिधिहरूलाई सहभागी हुन आह्वान गरिएको छ। त्यस्तै, बागमती प्रदेश सरकारका मन्त्रीहरू, जिल्ला समन्वय समितिका पदाधिकारी र प्रमुख जिल्ला अधिकारीलगायतको पनि सहभागिता रहने गाउँपालिकाले जनाएको छ।
