काठमाडौं । प्रतिनिधिसभाकी उपसभामुख इन्दिरा रानाविरुद्ध महाअभियोग प्रस्ताव दर्ता गर्ने तयारी भइरहेका बेला नेपाली कांग्रेसभित्र आन्तरिक मतभेद चुलिएको छ। शेखर कोइराला नेतृत्वको समूह यस प्रक्रियाप्रति असन्तुष्ट रहँदै हस्ताक्षर अभियानमा सहभागी नभएको हो।
मंगलबार बिहान सभापति शेरबहादुर देउवाले बुढानीलकण्ठस्थित निवासमा बोलाएको बैठकमा कोइराला समूह अनुपस्थित रह्यो। त्यसपछि संसदीय दलका सांसदलाई सिंहदरबारमा बोलाएर हस्ताक्षर संकलन सुरु गरिएको थियो। तर कोइराला पक्षका सांसदहरू सो प्रक्रियामा पनि देखिएनन्।
यसअघि सोमबार साँझ प्रधानमन्त्री निवास बालुवाटारमा कांग्रेस र एमालेका शीर्ष नेताबीच छलफल हुँदा उपसभामुख रानालाई ‘पदीय मर्यादाविपरीत गतिविधि गरेको’ आरोपमा हटाउने सहमति बनेको थियो। बैठकमा प्रधानमन्त्री केपी शर्मा ओली, कांग्रेस उपसभापति पूर्णबहादुर खड्का, गृहमन्त्री रमेश लेखकलगायत नेताहरू सहभागी थिए।
सो सहमति सार्वजनिक भएपछि असन्तुष्ट कोइराला समूह पार्टी नेतृत्वले गरेको बैठक बहिष्कारमा उत्रिएको हो। कोइराला निकट एक सांसदका अनुसार, उपसभामुखविरुद्धको महाअभियोग प्रस्तावमा कोइरालाले हस्ताक्षर नगर्ने स्पष्ट गरेका छन्।
