रामेछाप । राष्ट्रिय सूचना दिवसको अवसरमा जिल्ला प्रशासन कार्यालय रामेछापले सूचनाको हकका लागि राष्ट्रिय महासंघ RTI रामेछापको समन्वयमा सुचनाको हक सम्बन्धी अन्तरक्रिया कार्यक्रम आयोजना गरेको छ। मंगलबार सम्पन्न कार्यक्रममा जिल्लाभित्रका सरकारी कार्यालयका प्रमुख, सूचना अधिकारी, पत्रकार तथा विभिन्न संघ–संस्थाका प्रतिनिधिहरूको सहभागिता रहेको थियो।
सूचनाको हकका लागि राष्ट्रिय महासंघ रामेछापको समन्वयमा भएको कार्यक्रममा सहभागी सरोकारवालाले सरकारी कार्यालयहरूले सूचना माग्दा सहज र पारदर्शी ढंगले उपलब्ध नगराएको गुनासो गरेका थिए। पत्रकारहरूले सूचना माग्नासाथ कतिपय कार्यालयले गलत दृष्टिकोणले हेर्ने गरेको आरोप लगाउँदै यस्तो प्रवृत्तिले पत्रकारिता पेशामात्र होइन, सर्वसाधारण नागरिकले पाउने संवैधानिक अधिकारमै बाधा पुर्याउने बताएका थिए।
पत्रकारहरूले सरकारी कार्यालयहरूलाई सूचना प्रवाहलाई सहज, समयमै र पारदर्शी बनाउन आग्रह गर्दै यसबारे सचेतता र व्यवहारमै सुधार आवश्यक रहेको कुरामा जोड दिए। “सूचना माग्नेबित्तिकै पत्रकारलाई शंका गर्ने दृष्टिले हेर्नु गलत हो, यस्तो प्रवृत्ति तत्काल रोकिनुपर्छ,” सहभागी पत्रकारहरूको भनाइ थियो।
कार्यक्रममा जिल्ला प्रशासन कार्यालय रामेछापका प्रमुख श्यामकृष्ण थापाले सूचना अधिकारलाई कार्यान्वयन गर्ने जिम्मेवारी सरकारी कार्यालयमै रहेको उल्लेख गर्दै, “सूचना दिनु कार्यालय प्रमुख र सूचना अधिकारीहरूको कानुनी दायित्व हो, यसमा कुनै बहाना चल्दैन,” भन्दै सबै निकायलाई सूचना अधिकार कार्यान्वयनमा गम्भीर हुन निर्देशन दिए।
कार्यक्रममा सूचनाको हकसम्बन्धी कार्यपत्र सुचनाको हक सम्बन्धी राष्ट्रिय महासंघ रामेछापका प्रमुख हिमाल ढुंगेलले प्रस्तुत गरेका थिए। उनले सूचना प्रवाहलाई पारदर्शी र समयमै उपलब्ध गराउन सकेमात्र नागरिकको राज्यप्रतिको विश्वास बढ्ने बताएका थिए।
तर अन्तरक्रियामा सहभागी सरकारी कार्यालयका प्रमुखहरू भने मौन बसेका थिए। उनीहरूको मौनताले सरकारी निकायमा अझै पनि सूचना प्रवाहबारे गम्भीरता र प्रतिबद्धताको कमी रहेको संकेत मिलेको सरोकारवालाले टिप्पणी गरेका छन्।
