काठमाडौँ । स्वास्थ्य तथा जनसङ्ख्या मन्त्री प्रदीप पौडेलले बालबालिकाको प्रतिरोध क्षमता अभिवृद्धि गर्न आयुर्वेदिक पद्धतिको स्वर्णप्राशन थोपा वितरण गर्ने निर्णय गरेका छन् । स्वर्ण भष्मलाई घ्यू र महमा मिसाएर तयार पारिने यो थोपा सेवन गरेपछि बालबालिकाको शारीरिक तथा मानसिक विकाससँगै रोगसँग लड्ने क्षमता बढ्ने विज्ञहरूले बताउँदै आएका छन् ।
मन्त्रीस्तरीय निर्णयअनुसार देशभर जन्मेको ६ महिनादेखि ५ वर्षसम्मका बालबालिकालाई यो थोपा खुवाइनेछ । यसका लागि मन्त्रालयले आवश्यक निर्देशिका समेत स्वीकृत गरेको छ । स्वास्थ्य मन्त्रालयका प्रवक्ता डा. प्रकाश बुढाथोकीका अनुसार देशभरका २५ आयुर्वेदिक स्वास्थ्य संस्थाबाट पहिलो चरणमा यो कार्यक्रम सुरु हुनेछ । आगामी वर्षदेखि भने सबै आयुर्वेदिक संस्थामा विस्तार गर्ने योजना छ । ‘देशभित्रकै आयुर्वेदिक प्रविधिको प्रवर्द्धनमार्फत नागरिकको स्वास्थ्य सुरक्षामा योगदान दिने महत्त्वपूर्ण कदम यसलाई मान्न सकिन्छ,’ प्रवक्ता बुढाथोकीले भने ।
मन्त्री पौडेलले आयुर्वेदिक औषधी तथा उपचार पद्धति प्रवर्द्धन गर्न स्वदेशी उत्पादकलाई अन्तर्राष्ट्रिय स्तरमा प्रतिस्पर्धी बनाउन जिएमपी (Good Manufacturing Practice) प्रमाणपत्र लिन सक्ने व्यवस्था मिलाएका छन् । यससँगै विदेश निर्यात र भित्री बजारमा गुणस्तरीय उत्पादन सहज हुने अपेक्षा गरिएको छ । मन्त्रीको सचिवालयका अनुसार नयाँ बजेटमार्फत सबै स्थानीय तहमा नागरिक आरोग्य कार्यक्रम समेत अघि बढाइएको छ ।
