काठमाडौं । आगामी कात्तिक १७ मा रुपन्देही क्षेत्र नम्बर ३ मा हुने प्रतिनिधि सभा सदस्य उपनिर्वाचनका लागि २६ राजनीतिक दल दर्ता भएका छन् । निर्वाचन आयोगमा कुल २७ राजनीतिक दलले निवेदन दिएकोमा आवश्यक कागजात अपूर्ण रहेकाले नागरिक उन्मुक्ति पार्टी (नाउपा) अयोग्य ठहर भएको आयोगकी प्रवक्ता नीता पोखरेल अर्यालले जानकारी दिइन् ।
निर्वाचन आयोगले संविधानको धारा २६९ र राजनीतिक दल सम्बन्धी ऐन, २०७३ को दफा ४ अनुसार दर्ता भई कार्यरत दलहरुलाई उपनिर्वाचन प्रयोजनका लागि मान्यता दिने निर्णय गरेको हो । आयोगले यसअघि २१ साउनमा गरेको निर्णयअनुसार उम्मेदवारी दर्तासहित सम्पूर्ण प्रक्रिया अघि बढाइने स्पष्ट गरेको छ ।
आयोगले जारी गरेको प्रेस विज्ञप्तिअनुसार दर्ता भएका दलहरुमा माङोल नेशनल अर्गनाइजेसन, राष्ट्रिय प्रजातन्त्र पार्टी, नेपालका लागि नेपाली पार्टी, जनमत पार्टी, राष्ट्रिय मुक्ति आन्दोलन नेपाल, जनता समाजवादी पार्टी, नेपाली कांग्रेस, राष्ट्रिय जनमोर्चा, नेपाल कम्युनिस्ट पार्टी (माओवादी केन्द्र), जनजातान्त्रिक पार्टी नेपाललगायत छन् । यी दलहरुले अब उपनिर्वाचनमा भाग लिन सक्नेछन् ।
रुपन्देही क्षेत्र नम्बर ३ को उपनिर्वाचन प्रतिनिधि सभा सदस्यको निधनपछि रिक्त रहेको स्थान पूर्ति गर्न हुन लागेको हो । आगामी १७ कात्तिकमा हुने मतदानमा दलहरुले उम्मेदवार तय गरी प्रचार–प्रसारमा जानेछन् ।
निर्वाचन आयोगले निष्पक्ष, भयरहित र शान्तिपूर्ण वातावरणमा निर्वाचन सम्पन्न गर्न आवश्यक तयारी भइरहेको जनाएको छ । आयोगका अनुसार उम्मेदवार मनोनयनदेखि मतगणना र नतिजा प्रकाशनसम्मको सम्पूर्ण प्रक्रिया सुव्यवस्थित बनाउन विशेष योजना तयार गरिएको छ ।
यसैबीच, दर्ता भएका राजनीतिक दलहरु उम्मेदवार छनोट र निर्वाचन रणनीतिमा सक्रिय भइरहेका छन् । प्रमुख दलहरुबीच तालमेल हुने वा छुट्टाछुट्टै प्रतिस्पर्धा गर्ने भन्ने विषयमा छलफल तीव्र बनेको छ ।
