सिन्धुली, २४ साउन । सिन्धुलीको गोलन्जोर गाउँपालिकामा निर्माण भएको आधारभूत अस्पताल अब सञ्चालनमा आउने भएको छ। यसका लागि गोलन्जोर गाउँपालिका र मदन भण्डारी स्वास्थ्य विज्ञान प्रतिष्ठानबीच अस्पताल सञ्चालन तथा स्वास्थ्य सेवा सुदृढीकरणका लागि द्विपक्षीय समझदारी पत्रमा हस्ताक्षर गरिएको हो।
गोलन्जोर गाउँपालिकामा बिहीबार आयोजित कार्यक्रममा प्रतिष्ठानका उपकुलपति डा. प्रदीप ज्ञवाली र गाउँपालिका अध्यक्ष शंकरराज बरालले सम्झौतापत्रमा हस्ताक्षर गरेका हुन्।
समझदारीअनुसार अस्पताल सञ्चालनका लागि आवश्यक शैक्षिक तथा क्लिनिकल प्रशिक्षण, समुदायमा आधारित आउटरिच कार्यक्रम, अनुसन्धान, मानव स्रोत आदान–प्रदान, स्वास्थ्य पूर्वाधारको व्यावसायिक विकास तथा नीतिनिर्माणलगायतका क्षेत्रमा प्रतिष्ठानले सहयोग गर्नेछ।
कार्यक्रममा उपकुलपति डा. ज्ञवालीले ग्रामीण क्षेत्रमा गुणस्तरीय स्वास्थ्य सेवा पुर्याउन प्रतिष्ठान प्रतिबद्ध रहेको बताए। गाउँपालिका अध्यक्ष बरालले यस सम्झदारीपछि गोलन्जोरवासीले सहज, गुणस्तरीय र पहुँचयोग्य स्वास्थ्य सेवा पाउने विश्वास व्यक्त गरे।
गोलन्जोर गाउँपालिकाको केन्द्र ग्वाल्टारमा निर्माण भएको यो अस्पताल सञ्चालनमा आएपछि सिन्धुली मात्र होइन, रामेछाप, ओखलढुंगा लगायतका जिल्लाका बिरामीले पनि लाभ पाउने छन्।
