हेटौँडा, २३ साउन । बागमती प्रदेशका मुख्यमन्त्री इन्द्रबहादुर बानियाँले आगामी साउन २७ गते प्रदेशसभाबाट विश्वासको मत लिने भएका छन्।
साउन २० मा एमाले–कांग्रेस गठबन्धनको समर्थनमा मुख्यमन्त्री बनेका बानियाँले नेपालको संविधानको धारा १६८ को उपधारा (४) तथा प्रदेश सभा नियमावली २०७४ को नियम १४३ को उपनियम (१) बमोजिम ३० दिनभित्र विश्वासको मत लिनुपर्ने संवैधानिक व्यवस्था छ। सोही अनुसार उनले प्रदेशसभा सचिवालयलाई बैठक बोलाउन जानकारी गराएका हुन्।
गत साउन २० मा कांग्रेसका ३७ र एमालेका २७ गरी ६४ सांसदको समर्थनमा मुख्यमन्त्री बनेका बानियाँले आफ्नो पार्टीभित्र नेतृत्व परिवर्तन गर्दै तत्कालीन दल नेता बहादुरसिंह लामालाई पदबाट हटाएर सरकारको नेतृत्व सम्हालेका थिए।
हाल बागमती प्रदेशमा १४ मन्त्रालयमध्ये एमालेले ६, कांग्रेसले मुख्यमन्त्रीसहित ८ मन्त्रालय पाउने सहमति भएको छ। तर बाँकी ६ मन्त्रालयको जिम्मा अझै बानियाँकै काँधमा छ। सरकारलाई पूर्णता दिने तयारीसँगै उनले विश्वासको मत लिने प्रक्रिया अघि बढाएका हुन्।
