हेटौंडा । नेपाली कांग्रेस बागमती प्रदेश सभा संसदीय दलको नेतामा इन्द्र बानियाँ निर्वाचित भएका छन्। बुधबार हेटौंडामा सम्पन्न निर्वाचनमा बानियाँले बहुमत प्राप्त गर्दै दलको नेतृत्व सम्हालेका हुन्।
३७ सदस्यीय कांग्रेस संसदीय दलमा बानियाँले २२ मत प्राप्त गर्दै विजयी भएका हुन्, भने उनका प्रतिस्पर्धी बहादुर सिंह लामाले १४ मतमा सीमित भए। एक मत बदर भएको थियो।
यसअघि बानियाँकै अगुवाइमा लामाविरुद्ध अविश्वास प्रस्ताव दर्ता गरिएको थियो, जुन २२ मतले पारित भएपछि लामा पदमुक्त भएका थिए। सोही प्रस्ताव पारित भएसँगै रिक्त बनेको संसदीय दलको नेताको पदका लागि बुधबार पुनः निर्वाचन भएको हो।
बानियाँ र लामाबीच यो कार्यकालमै दोस्रो पटक प्रतिस्पर्धा भएको हो। २०७९ सालमा भएको पहिलो प्रतिस्पर्धामा भने लामा विजयी भएका थिए।
संसदीय दलको नेतामा निर्वाचित बानियाँ कांग्रेस बागमती प्रदेश सभाका सभापतिसमेत हुन्। अब उनले प्रदेशको सत्ता समिकरणमा निर्णायक भूमिका निर्वाह गर्ने अनुमान गरिएको छ।
