काठमाडौं – रामेछापका प्रतिनिधिसभा सदस्य एवं नेपाली कांग्रेसका सांसद पूर्णबहादुर तामाङले आफ्नो तीन महिनाको तलब प्रधानमन्त्री दैवी प्रकोप उद्धार कोषमा जम्मा गर्ने घोषणा गरेका छन्।
मंगलबार रसुवागढीमा आएको भीषण बाढीबाट भएको जनधन र संरचनात्मक क्षतिको राहत तथा पुनःनिर्माणमा टेवा पुगोस् भन्ने उद्देश्यले उनले उक्त सहयोग गर्न लागेको जानकारी दिएका हुन्।
प्रतिनिधिसभाको अर्थ समितिमा बोल्दै सांसद तामाङले रसुवागढी बाढी प्रभावित क्षेत्रमा खर्च गर्न सकिने गरी आफ्ना तीन महिनाको तलब प्रधानमन्त्री कार्यालयमार्फत कोषमा पठाउन निवेदन दिएको जानकारी गराएका हुन्।
सांसद तामाङले यस्तो संकटको घडीमा सबै जनप्रतिनिधिहरू र नागरिक समाजलाई सहयोगको हात बढाउन पनि आग्रह गरेका छन्।
उनको यो घोषणा मानवीयता र सामाजिक उत्तरदायित्वप्रति प्रतिबद्धताको उदाहरणका रूपमा लिइएको छ।
रसुवामा आएको बाढीले हालसम्म ९ जनाको ज्यान लिइसकेको छ भने १९ जना अझै बेपत्ता छन्। सरकारी संयन्त्र राहत र उद्धार कार्यमा सक्रिय रहेको छ।
