काठमाडौं, असार २३ —संविधान संशोधन प्रक्रिया अघि बढाउन नेपाली कांग्रेसले औपचारिक तयारी सुरु गरेको छ। पार्टी केन्द्रीय कार्यालय सानेपामा बसेको केन्द्रीय समितिको बैठकले संशोधनका सम्भाव्यता, आवश्यकता र राजनीतिक सहमति निर्माण गर्न कार्यदल गठन गर्ने निर्णय गरेको हो।
पार्टी प्रवक्ता डा. प्रकाशशरण महतका अनुसार गठबन्धनका बेला एमालेसँग भएको सात बुँदे सहमतिअनुसार अब संविधान संशोधनको विषयलाई ढिलाइ नगरी अघि बढाउने निष्कर्ष कांग्रेसले निकालेको छ।
“सात बुँदे सहमतिमा संविधान प्रारम्भपछि अभ्यासमा देखिएका सबल–दुर्बल पक्षको समीक्षा गरी संशोधन र तदनुकूल कानून निर्माण गर्ने उल्लेख छ,” महतले बैठकपछि जानकारी दिँदै भने, “त्यही आधारमा कार्यदल बनाउने निर्णय गरिएको हो।”
बैठकको निर्णय अनुसार, कार्यदलले पार्टीभित्र व्यापक छलफल गर्नेछ। साथै, संविधान निर्माणमा सहकार्य गरेका दलहरू, विज्ञ, विशेषज्ञ तथा सरोकारवाला नागरिक समाजसँग संवाद गरेर संशोधन प्रस्ताव तयार गर्ने जिम्मेवारी कार्यदललाई दिइनेछ। कांग्रेसले यो कदम संविधानको सुदृढ कार्यान्वयन, राजनीतिक स्थायित्व र लोकतान्त्रिक अभ्यासलाई संस्थागत गर्न आवश्यक पहलको रूपमा लिएको बताएको छ।
“संघीय लोकतान्त्रिक गणतन्त्र नेपालको संविधानको रक्षा र प्रभावकारी कार्यान्वयन कांग्रेसको प्रमुख जिम्मेवारी हो भन्नेमा पार्टी स्पष्ट र प्रतिबद्ध छ,” बैठकको निर्णयमा उल्लेख छ। संविधान संशोधन विषयलाई लिएर दलहरूबीच पुनः बहस सुरु हुने संकेत देखिएसँगै कांग्रेसको यो निर्णय राजनीति तहमा महत्वपूर्ण विकासका रूपमा हेरिएको छ।
