रामेछाप, असार ९ । रामेछापको दोरम्बा शैलुङ गाउँपालिका–३ स्थित चिहान खोलामा आइतबार राति गएको पहिरोले स्थानीयको गोठ र घरमा क्षति पुर्याएको छ। लगातारको झरीसँगै गएको पहिरोले चेली बसेलको गोठ पुरिँदा गोठभित्र रहेका एक गाई र एक बाछोको घटनास्थलमै मृत्यु भएको गाउँपालिका अध्यक्ष मैनकुमार मोक्तानले जानकारी दिनुभयो।
त्यसैगरी, सोही स्थानका झगरसिं बसेलको घर पनि पहिरोले पूर्ण रूपमा क्षतिग्रस्त बनाएको छ। रातको समयमा पहिरो गएको भए पनि मानवीय क्षति भने नभएको जनाइएको छ।
घटनापछि गाउँपालिका अध्यक्ष मोक्तान, उपाध्यक्ष खमला थापामगर सहित स्थानीय जनप्रतिनिधि र प्रहरीको टोली सोमबार बिहानैदेखि घटनास्थलमा खटिएको छ। घटनाको स्थलगत अवलोकन गरी तत्काल राहत तथा पुनःस्थापना प्रक्रिया अघि बढाउने तयारी भइरहेको गाउँपालिकाले जनाएको छ।
चिहान खोलास्थित १२ घरमध्ये अन्य पाँचवटा घर अझै पहिरोको उच्च जोखिममा रहेको पाइएको छ। लगातारको वर्षासँगै जमिन चिप्लिएको र थप वर्षा भएमा थप क्षति हुने सम्भावना रहेकाले प्रभावित परिवारलाई सुरक्षित स्थानमा सार्ने विषयमा छलफल भइरहेको छ।
स्थानीयवासीका अनुसार सो क्षेत्र पहिरोको दृष्टिकोणले अति संवेदनशील क्षेत्रका रूपमा चिनिँदै आएको छ। अघिल्लो वर्ष भदौ महिनामा यही वडाको लेखर्क बस्तीमा गएको ठूलो पहिरोमा १० जनाले ज्यान गुमाएका थिए। त्यसयता स्थानीयमा पहिरोप्रति त्रास बढ्दो छ।
गाउँपालिकाले जोखिमयुक्त क्षेत्रको पहिचान गरी आवश्यक सुरक्षाका उपाय अवलम्बन गर्न तथा राहत र पुनःस्थापनाका लागि प्रदेश तथा संघ सरकारसँग समन्वय गर्ने बताएको छ। प्रभावित परिवारलाई तत्काल सुरक्षित स्थलमा सार्न तयारी भइरहेको र खाद्यान्न तथा आश्रयको व्यवस्थापनमा प्राथमिकता दिइने जनाइएको छ।
यसबीच, जिल्ला विपद् व्यवस्थापन समिति र सुरक्षा निकायलाई आवश्यक सहयोगका लागि आग्रह गरिएको गाउँपालिकाले जनाएको छ।
