रामेछाप, ८ असार ।
रामेछापको सदरमुकाम मन्थलीसँग जोडिएको कुनाउरीमा निर्माण भइरहेको तामाकोशी नदीको पक्की मोटरेबल पुल आइतबार दिउँसो भाँचिएको छ । मन्थली नगरपालिका–६ स्थित भलुवाखोला र वडा नं. ७ को ठेडिखोला जोड्ने पुल निर्माणको क्रममा स्पानसहितको भाग एक्कासी पिल्लरबाट भाँचिएर भुइँमा खसेको हो ।
करिब दुई महिनाअघि पनि पुलको बीचको स्पान चिरा परेर भाँचिएको थियो । त्यतिबेला प्राविधिकहरुले मर्मत सम्भव हुने प्रतिवेदन दिएपछि निर्माण कम्पनीले काम अघि बढाएको थियो । सोही स्पान मर्मतकै क्रममा पुनः भाँचिएको हो । स्थानीय यज्ञप्रसाद ढुंगेलका अनुसार मर्मतको काम भइरहेकै बेला पुलको बीच भाग अकस्मात भत्किएको हो । मन्थली–७ का निवर्तमान वडाध्यक्ष सुदर्शन प्रसाईले पिल्लरसहितको भाग झरेको जानकारी दिएका छन् ।
घटना थाहा पाउनेबित्तिकै स्थानीयवासी ठूलो संख्यामा पुल निर्माण स्थलमा जम्मा भएका थिए । निर्माणको अन्तिम चरणमा पुगेको पुल यसरी भत्किएपछि स्थानीय चिन्तित बनेका छन् । लामो समयदेखि पर्खंदै आएको विकास पूर्वाधार निर्माणमै भत्किनुले निर्माण कार्यको गुणस्तरप्रति प्रश्न उठाएको उनीहरूको गुनासो छ ।
सडक विभागले आर्थिक वर्ष २०७७/७८ मा कालिका–कल्पवृक्ष जेभीसँग २२ करोड ५५ लाख ४ हजार रुपैयाँको ठेक्का सम्झौता गरेको थियो । चार स्पानसहित २३० मिटर लम्बाइ र ११ मिटर चौडाइको पुल भदौ मसान्तभित्र सम्पन्न गर्ने लक्ष्यसहित निर्माण भइरहेको थियो । तर हालसम्म ठेकेदार कम्पनीले सम्झौता रकमको झण्डै ६० प्रतिशत भुक्तानी लिइसकेको छ ।
पुल सञ्चालनमा आएपछि मन्थली–खुर्कोट सडक खण्ड हुँदै तराईका जिल्लासम्मको दूरी छोटिने र राजधानी काठमाडौँ आवतजावत समेत सहज हुने अपेक्षा गरिएको थियो । साथै, यस पुललाई मन्थलीबाट जिल्लाका तीन वटा पालिका जोड्ने वैकल्पिक मार्गको रूपमा समेत हेरिएको छ ।
तर निर्माणकै क्रममा दुईपटक स्पान भाँचिएपछि पुलको भविष्य अन्योलमा परेको छ । निर्माण कम्पनीको लापरवाही र कमजोर प्राविधिक मूल्यांकनका कारण यस्तो अवस्था आएको स्थानीयको आरोप छ । अब सम्बन्धित निकायको जवाफदेहिता र आगामी समाधानको बाटो के हुन्छ भन्ने विषयमा चासो बढेको छ ।
