रामेछाप — मन्थली नगरपालिका–२, तामाकोशी नदी किनारमा आज विपद् पूर्व तयारी तथा प्रतिकार्य सम्बन्धी संयुक्त कृतिम अभ्यास कार्यक्रम सम्पन्न भएको छ ।
जिल्ला प्रशासन कार्यालय रामेछापको समन्वय र सहकार्यमा सम्पन्न कार्यक्रममा प्रमुख जिल्ला अधिकारी श्यामकृष्ण थापाको प्रमुख आतिथ्यतामा भएको थियो । अभ्यासमा श्री खड्गदल गण रामेछाप, जिल्ला प्रहरी कार्यालय, श्री सशस्त्र प्रहरी बल आश्रित गुल्म, र नेपाल रेडक्रस सोसाइटी रामेछाप लगायतका निकायको सक्रिय सहभागिता रहेको थियो ।
कार्यक्रममा स्थानीय जनप्रतिनिधि, सञ्चारकर्मी, स्वयंसेवक र सुरक्षाकर्मीहरू गरी करिब ८५ जना सहभागी भएका थिए ।
अभ्यासमा बाढी तथा डुबानजस्ता विपद् अवस्थाहरूमा कसरी उद्धार र राहत कार्य संचालन गर्ने भन्ने विषयमा कृतिम अभ्यास प्रदर्शन गरिएको थियो । उद्धार कार्य, प्राथमिक उपचार, राहत व्यवस्थापन र समन्वय प्रक्रियाको अभ्यास गरिएको थियो ।
प्रमुख जिल्ला अधिकारी थापाले यस्ता अभ्यासले विपद् व्यवस्थापनमा समन्वय र तत्परताको अभ्यास हुने भन्दै सबै निकायलाई अझ सक्रिय र जिम्मेवार बन्न आग्रह गर्नुभयो । सहभागी निकाय तथा स्थानीयबासीले यस्ता अभ्यास कार्यक्रमले जोखिम न्युनिकरणमा महत्वपूर्ण भूमिका खेल्ने बताएका छन् ।
