हेटौँडा । बागमती प्रदेशका मुख्यमन्त्री बहादुर सिंह लामाले युवा पलायतलाई रोक्नु प्रमुख चुनौतीको रुपमा देखापरेको बताउनु भएको छ । प्रदेश युवा परिषद् बागमतीको आयोजनामा आइतबारदेखि सुरु भएको प्रदेश युवा सम्मेलन २०८२ लाई सम्बोधन गर्दै मुख्यमन्त्री लामाले युवालाई पलायन हुन बाट रोक्न सरकारलाई चुनौतिको विषय बन्दै गएको बताउनु भयो ।
मुख्यमन्त्री लामाले आगामी वर्षको बजेटमा युवाहरुको संशक्तिकरणलाई मुख्य प्राथमिकतामा राख्ने प्रतिबद्धता व्यक्त गर्नु भएको छ । जनसांख्यीक लाभको अवसरलाई पुँजीगत गरी प्रदेशको आर्थिक समृद्धिमा युवाको योगदान सुनिश्चित्त गर्नुपर्ने उहाँको भनाई छ ।
युवालाई रोजगारी र उत्पादनसंग आबद्ध गर्न प्रदेश सरकारले पर्याप्त मात्रामा लगानी गरिरहेको समेत उहाँले उल्लेख गर्नुभयो । मुख्यमन्त्री लामाले रोजगारीको नाममा धेरै युवाहरु विदेशी भुमिमा पसिना बगाउनुपरेको दृष्टान्त प्रस्तुत गर्दै ति युवाहरुले पठाएको रेमिट्यान्सले नै नेपालको अर्थतन्त्र धानेको बताउनुभयो ।
स्वदेशमै रोजगारीको अवसर दिलाउन प्रदेश सरकारले कोसिस गरिरहेको समेत उहाँले दाबी गर्नुभयो । मुख्यमन्त्री लामाले प्रदेश सरकारको एकल अधिकारको रुपमा विश्वविद्यालय स्थापना गरी अध्यापनको तयारी गरिरहेको समेत बताउनुभयो ।
मुख्यमन्त्री लामाले प्रदेश सरकारले सञ्चालन गर्ने युवा लक्षित कार्यक्रमहरु युवाहरुको भावना र आवश्यकताको जगमा बनेको बताउनुभयो ।आइतबार देखि सुरु भएको युवा सम्मेलनको बहस र छलफलको केन्द्रमा युवाको शिक्षा, सीप र रोजगारलाई राख्नुपर्ने समेत मुख्यमन्त्री लामाको जोड थियो ।
वैशाख ३० गतेसम्म चल्ने सम्मेलनमा ७ वटै प्रदेशका ३ सय भन्दा बढी युवाहरुको सहभागिता रहेको छ । सम्मेलनमा कृषिमा नवप्रवर्तन र यूवा संलग्नता सम्भावना र चुनौती, डिजिटल सुशासन र प्रविधिमा युवा, शिक्षा सीप र सिर्जना, दिगो विकासमा जलवायु परिवर्तन र युवा, युवामा सीपमूलक तालिमको आवश्यकता र प्रभावकारिता, नीति नेतृत्व र युवा संलग्नता तथा मुख्यमन्त्रीसँग युवा लगायतका विषयमा विज्ञहरुसँग प्यानल छलफल र कार्यशाला गोष्ठी आयोजना हुनेछन् । उद्घाटन कार्यक्रम पूर्व विभिन्न भेषभुषा, साँस्कृतिक झाँकी, नेपाल प्रहरीको ब्यान्ड बाजा सहित हेटौंडाको बुद्धचोकबाट ¥याली निकालिएको थियो ।