काठमाण्डौं । नेपाल राष्ट्र बैंकको गभर्नर नियुक्तिका विषयमा नेपाली काँग्रेसका सभापती शेरबहादुर देउवाले प्रधानमन्त्री केपी शर्मा वलीलाई बचाउ गदैं बोलेका छन् । कांग्रेसका सभापति शेरबहादुर देउवाले नेपाल राष्ट्र बैंकभित्रकै समस्याले गर्दा गभर्नर नियुक्तिमा ढिलाइ भइरहेको भन्दै त्यसमा प्रधानमन्त्रीको कारण ढिलाई नभएको बताएका छन् ।
मंगलबार पार्टी केन्द्रीय कार्यालय सानेपामा आर्थिक नीति तथा योजना विभागले गरेको कार्यक्रममा बोल्दै सभापति देउवाले राजनीतिक कारण भन्दा पनि राष्ट्र बैंक भित्रैको समस्याले गभर्नर नियुक्तिमा ढिलाइ भएको बताएका छन् ।
‘गभर्नरको विषयमा अहिले राजनीतिक समस्या छैन, ओलीजी पनि सकारात्मक नै हुनुहुन्छ, राष्ट्र बैंक भित्रकै समस्या हो,’ सभापति देउवाले भने । सभापति देउवाले नेपाल राष्ट्र बैंकका कार्यकारी निर्देशक डा. गुणाकर भट्टलाई गभर्नर बनाउन प्रधानमन्त्री केपी शर्मा ओलीसँग पटकपटक कुराकानी गरेका थिए । भट्टले पनि कार्यकारी निर्देशकबाट राजीनामा दिइसकेका छन् तर स्वीकृत भएको छैन ।
गभर्नरका लागि प्रधानमन्त्री र देउवाबीच समझदारी भएका गुणाकर भट्टले अमेरिकाबाट अर्थशास्त्रमा पिएचडी गरेका छन्। साथै कांग्रेस नेता प्रकाशशरण महत अर्थमन्त्री हुँदा उनी सल्लाहकार पनि थिए । अब उपप्रधानमन्त्री पौडेल नेतृत्वको सिफारिस समितिले गभर्नरका लागि तीन जनाको नाम सिफारिस गर्नेछ । ती नाममध्ये एक जनालाई मन्त्रिपरिषदले गभर्नर नियुक्त गर्नेछ ।
प्रधानमन्त्री र सभापति देउवाबीच भट्टलाई गभर्नर नियुक्त गर्ने समझदारी बनेकोले उनी नै गभर्नर हुने सम्भावना देखिन्छ। यसबीच सोमबार बिहान भट्टले बूढानीलकण्ठ पुगेर सभापति देउवालाई भेट पनि गरेका थिए । साथै उपप्रधान तथा अर्थमन्त्री विष्णु पौडेल सोमबार बिहान सभापति देउवा निवास बूढानीलकण्ठ पुगेका थिए । आगामी वर्षको बजेटका सन्दर्भमा अर्थमन्त्री पौडेल र सभापति देउवाबीच कुराकानी भएको बताइएको छ ।