रामेछाप । नेपाल पत्रकार महासंघ रामेछापले विश्व प्रेस स्वतन्त्रता दिवसको अवसरमा पत्रकारहरुको होलवडी परीक्षण तथा रक्रदान कार्यक्रम सम्पन्न गरेको छ । जिल्ला जनस्वास्थ्य कार्यालय रामेछापको समन्वय, मन्थली अस्पताल र नेपाल रेडक्रस सोसाईटी रामेछापको प्राविधिक सहयोगमा पत्रकार महासंघ रामेछापले शनिवार पत्रकारहरुको होलवडी परीक्षण तथा रक्रदान कार्यक्रम गरेको हो ।
मन्थली अस्पतालमा ३१ जना भन्दा बढी रामेछापका क्रियाशिल पत्रकारहरुले आफ्नो होलवडी परीक्षण गराएका छन् । त्यसै गरी १० जना पत्रकारहरुले रक्तदान गरेका छन् । रत्तदान कार्यक्रम संगै भएको अन्तरक्रिया कार्यक्रममा मन्थली अस्पताले आफ्ना सेवा प्रवाहको अवस्थाका बारेमा जानकारी गराएको छ । मन्थली नगरपालिका स्वास्थ्य शाखा प्रमुख केशवराज फुयालको समेत उपस्थितिमा मन्थली अस्पतालका प्रमुख मेडिकल सुपरिटेन्डेन्ट केशव धामीले अहिले अस्पतालको सेवा प्रवाहको अवस्थाका बारेमा जानकारी गराउनु भयो । उहाँले मन्थली अस्पतालले स्वास्थ्य बिमा, २४ सै घण्टा आकस्मिक, २४ सै घण्टा प्रयोगशाला सेवा, फार्मेसी सेवा वगायतका २१ भन्दा बढी सेवाहरु प्रदान गरिरहेको बताउनु भयो । मन्थली अस्पतालबाट चालु आर्थिक वर्षको ६ महिना साउनदेखि पुस महिनासम्म २६ हजार ८९२ जनाले सेवा लिएका उहाँले बताउनुभयो । उक्त कार्यक्रममा सहभागिहरुले अस्पतालको सेवा प्रवाह, औषधी सेवा लगायतका बिषयमा विभिन्न प्रश्नहरु गरेका थिए ।
प्रश्नहरुको जवाफ दिँदै स्वास्थ्य शाखा प्रमुख केशवराज फुयाल र अस्पतालका प्रमुख केशव धामीले सबैको सल्लाह सुझाव लिएर अस्पतालको सेवा प्रवाहलाई अझै प्रभावकारी बनाउने गरी लागि परेको बताउनु भयो ।
नेपाल पत्रकार महासंघको ७० औँ स्थापना दिवसका अवसरमा चैत्र १७ गते तोकिएको कार्यक्रम पत्रकार सुरेश रजकको हत्या भएपछि रोकिएको थियो । शनिवार विश्व प्रेस स्वतन्त्रता दिवसको अवसर परेर स्थापना दिवस विशेष कार्यक्रम पनि आयोजना गरिएको पत्रकार महासंघ रामेछापका अध्यक्ष दीपक घिमिरेले बताउनु भयो ।