रामेछाप । नेपाली काँग्रेस रामेछापका सभापतिको कार्यशैलीको विरोध गर्दै पदाधिकारीहरूले सभापति शेरबहादुर देउवालाई ध्यानाकर्षण पत्र बुझाएको छ । ऊर्जा, जलस्रोत तथा सिचाइ राज्यमन्त्रीसमेत रहेका जिल्ला सभापति पूर्णबहादुर तामाङ (कान्छाराम) ले कार्यकालको सुरुवातीदेखि नै पार्टीको विधि विधान र पद्धतिको बेवास्ता गर्दै स्वेच्छाचारी ढङ्गबाट अगाडि बढेको आरोप लागेको जिल्ला पदाधिकारीहरूले लगाउँदै आएको छ ।
रामेछाप काँग्रेसका उपसभापति नवराज थोकर, सचिव विनोद कार्की, सहसचिव कमल योञ्जनले कान्छारामले शक्ति सन्तुलन, भौगोलिक र समावेशी प्रतिनिधित्वलाई ख्याल नगरी पार्टीमा निरन्तर क्रियाशील इमानदार कार्यकर्तालाई बेवास्ता गर्ने, निष्ठावान् र योग्य नेता तथा कार्यकर्ताहरूमाथि गालीगलौज गरी अवमूल्यन गर्ने, केही आसेपासेको सल्लाहमा एकलौटी ढङ्गबाट राजनीतिक नियुक्ति र मनोनीत गर्ने गरेको आरोप लगाएका छन् ।
उनीहरूले पार्टी सभापति शेरबहादुर देउवासहित उपसभापति द्वय, महामन्त्री द्वय, नेता शेखर कोइरालालगायतका नेताहरूलाई बोधार्थ (जानकारी) गराई पार्टी केन्द्रीय कार्यालय सानेपामा ध्यानाकर्षण पत्र बुझाएका छन् । कान्छारामको कार्यशैलीले सङ्गठनलाई गतिशील र प्रभावकारी बनाउन पार्टीभित्र रगत र पसिना बगाएका, लोकतान्त्रिक व्यवस्था स्थापनार्थ आन्दोलनमा होमिएका कार्यकर्ताहरूको भूमिका कमजोर बनाएको उनीहरूको आरोप छ । गत पुस २७ गते काँग्रेसको एक सय दिने अभियानको क्रममा केन्द्रीय प्रतिनिधि मदन बहादुर अमात्यको प्रमुख आतिथ्यमा भएको जिल्ला कार्यसमितिको बैठकबाट निर्वाचित सदस्यहरूलाई हटाउने निर्णय भएको समेत उनीहरूले ध्यानाकर्षण पत्रमा उल्लेख गरेका छन् । पत्रअनुसार १४औँ जिल्ला अधिवेशनमा मतदान प्रक्रियामार्फत जिल्ला कार्यसमिति सदस्यमा निर्वाचित भई हाल केही समय अगाडि वैदेशिक रोजगारीमा गएका जिल्ला कार्य समितिका सदस्यहरू मन्दिरा घिमिरे, सुशीला बुढाथोकी, अन्जु रजान मगर र सम्झना घिसिङलाई हटाउने प्रस्ताव कान्छारामले राखेका थिए । सो प्रस्ताव केन्द्रीय प्रतिनिधि अमात्यले समेत अस्वीकार गरी निर्णय पुस्तिकामा हस्ताक्षर नगरेको बताइएको छ ।
‘उक्त निर्णयप्रति हामी असहमत छौँ नोट अफ डिसेन्ट (फरक मत) लेख्छौँ’ भन्दा लेख्न नदिएपछि आफूहरू बाध्य भएर बैठकबाट बाहिरिनुपरेको नेतात्रयहरुले ध्यानाकर्षण पत्रमा उल्लेख गरेका छन् । पार्टी मातहतका विभिन्न तहगत संरचना नेतृत्व तथा अन्य पदमा विविध कारणले रिक्त भएका स्थानमा सभापतिले विधान, नियमावली र केन्द्रीय परिपत्रको मर्म र भावना विपरीत आफूखुसी नियुक्ति गरेको भन्दै उनीको आपत्ति रहेको छ ।
त्यस्तै, काँग्रेसको मूल्य मान्यता र परम्परालाई बेवास्ता गर्दै पार्टी तथा भात संस्थाको कार्यक्रममा जिल्ला सभापतिको उपस्थितिमा उपसभापति लेखबहादुर कार्कीलाई कार्यवाहक सभापतिको रूपमा आसन ग्रहण गर्न लगाउने जस्ता गलत नजिर स्थापना गर्न खोजिएको पनि उनीहरूको आरोप छ । जिल्ला सभापति कान्छारामले ‘मलाई सङ्घीय सांसदको टिकट पार्टी सभापति शेरबहादुर देउवाले दिएको होइन । नेकपा (माओवादी केन्द्र) का अध्यक्ष पुष्पकमल दाहालले दिएको’ भनी पार्टीको बदनाम गरेको समेत उनीहरूको आरोप छ ।
ध्यानाकर्षण पत्रमा उल्लेख भएअनुसार कान्छारामले निर्माण व्यवसायी सङ्घ रामेछापको कार्यक्रममा ‘म काँग्रेस नभई ठेकेदार हुँ । त्यसैले आगामी निर्वाचनमा कुनै ठेकेदारले टिकट पाए पार्टी नहेरी जुनसुकै पार्टीको ठेकेदार भए पनि सहयोग गर्छु’ भन्ने अभिव्यक्तिसमेत दिएको पत्रमा उल्लेख गरिएको छ ।त्यस्तै, लोकतन्त्रवादी आदिवासी जनजाति महासङ्घ रामेछापको जिल्ला अधिवेशनमा कान्छारामले बागमती प्रदेश कार्यसमितिका सदस्य जीतबहादुर मगरलगायत जिल्लाका नेताहरूलाई छानाछानी कुटपिट गर्न लगाएको, आफूहरूलाई उल्टै ज्यान मार्ने उद्योगमा जिल्ला अदालत रामेछापमा मुद्दा हालेर दुःख दिएको उनीहरूले बताएका छन् ।
रामेछाप काँग्रेसका नेता त्रयले कान्छारामको कार्यशैली र विधान विपरीतका गतिविधिहरू अन्त्य गरी समन्वयात्मक ढङ्गबाट अगाडि बढ्ने वातावरण निर्माण गरिदिन आग्रह गरेका छन् । कान्छारामको स्वेच्छाचारी गतिविधिहरू नरोकिए आन्दोलन गर्ने भन्दै उनीहरूले नेतृत्वको ध्यानाकर्षण गराएका छन् । काँग्रेस केन्द्रीय कार्यालय सानेपामा अनशन बस्नेतसमेतको उनीहरूको चेतावनी छ ।
