रामेछाप । अविरल वर्षा सँगै यही असोज १२ गते आएको बाढी पहिरो बाट घाइते भएका घाइतेहरूको स्वास्थ्य अवस्था बुझ्न स्वास्थ्य तथा जनसङ्ख्या मन्त्री प्रदीप पौडेलले धुलिखेल आएका छन् । स्वास्थ्य मन्त्री पौडेलले धुलिखेल अस्पताल आएर उपचाररतहरूको घाइतेहरूको स्वास्थ्य अवस्थाबारे जानकारी लिएका छन् ।
शनिवार दिउसो अस्पताल आएका मन्त्री पौडेलले बाढी पहिरोमा परेर धुलिखेल अस्पतालमा उपचाररत घाइते र आफन्त भेटेर उपचार र व्यवस्थापनबारे जानकारी लिएका हुन् । धुलिखेल अस्पतालका प्रशासकीय निर्देशक डा. विराजमान कर्माचार्य, डा. राजेन्द्र कोजू लगायतले उपचाररत घाइतेको अवस्था र अस्पतालले गरिरहेको प्रयासबारे जानकारी गराएका थिए ।
मन्त्री पौडेलले घाइतेहरूको अवस्था बुझ्न र उपचार कसरी व्यवस्थित गराउन सकिन्छ भन्ने चासोका साथ अस्पताल आएको बताएका छन् । उनले बाढी र पहिरोमा परेर घाइते सबैको उपचार निःशुल्क गर्ने सरकारले निर्णय गरेको भन्दै उपचारको कुनै समस्या नभएकोले चिन्ता नलिन घाइते र घाइतेका आफन्तलाई आग्रह गरेका छन् । विपद्पछि हुन सक्ने स्वास्थ्यजन्य महामारीको बारेमा सरकार सचेत भएको भन्दै त्यसको तयारी गर्न निर्देशन समेत दिएका छन् । विपद्को समयमा धुलिखेल अस्पतालले पुर्याएको सेवाको प्रशंसा गर्दै मन्त्री पौडेलले सबैलाई साथमा लिएर अझै उत्कृष्ट सेवा दिन अनुरोध गरेका छन् ।
