रामेछाप । अख्तियार दुरुपयोग अनुसन्धान आयोगमा रामेछाप जिल्लामा रहेको स्थानीय तह मध्य सबै भन्दा बढी उजुरी खाँडादेवी गाउँपालिका र दोरम्बा शैलुङ्ग गाउँपालिका विरुद्ध परेको छ । रामेछाप जिल्लामा जम्मा परेको ३६ वटा उजुरी मध्य खाँडादेवी गाउँपालिका विरुद्ध  १२ र दोरम्बा शैलुङ्ग गाउँपालिका विरुद्ध ११ वटा रहेको छ । 

अख्तियार दुरुपयोग अनुसन्धान आयोगको कार्यालय बर्दिबासका सूचना अधिकारी तुलसीराम पौडेलका अनुसार सबै भन्दा बढी खाँडादेवी गाउँपालिकामा १२ वटा उजुरीहरू परेका छन् । जसमध्ये अहिले सम्म दुई वटा उजुरी फर्छ्यौट भएका छन् । यस्तै दोरम्बा सैलुङ गाउँपालिकामा ११ वटा उजुरी परेकोमा ११ वटै फर्छ्यौट हुन बाकी छ । जिल्ला सदरमुकाम समेत रहेको मन्थली नगरपालिकामा पाँच वटा उजुरी परेकोमा अहिलेसम्म एउटा मात्रै फर्छ्यौट भएको छ । रामेछाप नगरपालिकामा दुई वटा, उमाकुण्ड गाउँपालिकामा एउटा, गोकुलगंगा गाउँपालिकामा एउटा, सुनापति गाउँपालिकामा दुई वटा र लिखुतामाकोशी गाउँपालिकामा दुई वटा भ्रष्टाचार जन्य उजुरी परेकामा सबै उजुरीको फर्छ्यौट हुन बाकी रहेको जनाएको छ ।

शनिवार मन्थली नगरपालिकाको सहकार्यमा अख्तियार दुरुपयोग अनुसन्धान आयोगको कार्यालय बर्दिबासले आयोजना गरेको भ्रष्टाचार नियन्त्रण तथा सुशासन प्रवर्द्धन विषयक स्थानीय तह स्तरीय अन्तरक्रिया कार्यक्रममा रामेछापमा परेको उजुरीको बारेमा जानकारी गराइएको हो । गत आर्थिक वर्ष २०८०÷०८१ मा जिम्मेवारी सरेर आएका केही लगायत चालु आर्थिक वर्ष २०८१÷०८२ को साउन र भदौ महिनामा गरी ३६ वटा भ्रष्टाचार जन्य उजुरी अख्तियार दुरुपयोग अनुसन्धान आयोगको कार्यालय बर्दिबासमा परेका छन् । चालु आर्थिक वर्षको साउन, भदौ र गत वर्षको जिम्मेवारी सरेर आएका सहित रामेछापका आठ वटा स्थानीय तहमा गरी हालसम्म ३६ वटा उजुरी परेको अख्तियार दुरुपयोग अनुसन्धान आयोगको कार्यालय बर्दिबासका सूचना अधिकारी तुलसीराम पौडेलले बताउनु भयो ।