रामेछाप । जिल्लाका अधिकांस प्रहरी चौकीहरु सुरक्षित भवन नहुँदा जोखिममा रहेका छन् । जनताको सुरक्षाको लागि खटिएका प्रहरी नै भूकम्पले क्षति पु¥याएको जोखिमपूर्ण घरमा बसेर कार्यालय संचालन गर्दै आएका छन् ।
ग्रामिण भेगमा कार्यरत प्रहरीलाई कार्यक्षेत्रमा काम गर्न धेरै समस्या रहेको छ । ग्रामिण भेगमा रासन पानीको ब्यवस्थापनमा समेत समस्या रहेको प्रहरीको गुनासो छ । नागरिकको सुरक्षामा २४ सै घण्टा ड्यूटिमा खटिनु पर्ने तर सरकारले प्रहरीलाई दिनुपर्ने सेवासुविधा नथप्दा सारै समस्या भएको एक प्रहरी जवानले गुनासो गरे ।
कतिपय इलाका प्रहरी कार्यालयहरु पालमूनी सञ्चालन हुँदै आएको छ । ‘ख’ वर्गको इलाका प्रहरी कार्यालयमा २३ जनाको दरबन्दी हुने भए पनि रामेछापको बेथानमा रहेको ‘ख’ वर्गको इलाका प्रहरी कार्यालयमा ९ जनामात्र प्रहरी कार्यरत रहेका छन् । भवन र कार्यालय संचालन गर्न कोठाको अभाव छ । इलाका प्रहरी कार्यालय बेथानको कार्यक्षेत्र अन्तर्गत सबै तिर सडक सुविधा भए पनि यातायातको अभावमा काम गर्न निकै कठिन भएको प्रहरीको गुनासो छ ।
इलाका प्रहरी कार्यालयमा सवारी साधानको ब्यवस्था हुनुपर्ने हो तर सवारी साधन उपलब्ध नहुँदा काम गर्न कठिन भएको इलाका प्रहरी कार्यालय बेथानका इन्चार्ज नकुल भुजेलले बताए । उनले भने– पहाडी भुगोल भएकाले कतै घटना भइहाल्यो भने समयमै पुग्न सकिदैँन । बेथान प्रहरी चौकीले माग्न त चारपाङ्ग्रे सवारीसाधन माग गरेको थियो । ढिलै भएपनि अहिले एउटा मोटर साइकल पाएका छौं । त्यसले गर्दा काममा केही सहज त भएको छ । तर पुरानो मोटरसाइकल भएकाले पटक–पटक बिग्रीएर हैरान खेप्नु परेको छ नत भनेको समयमा नत मर्मत सम्हार गर्ने ठाउँ छ । नत कार्यालयमा प्रयाप्त मात्रामा बजेटको व्यवस्था नै छ । जसोतसो काम चलाएका छौं इन्चार्ज भुजेलले जानकारी दिए ।
जिल्लामा हाल इलाका प्रहरी कार्यालय बेथानले व्यक्तिको घरमा भाडा लिएर कार्यालय संचालन गर्दै आएको छ भने इलाका प्रहरी कार्यालय चोप्राङ भने गाउँपालिकाले निमार्ण गरिदिएको अस्थायी टहराबाट कार्यालय संचालन गर्दै आएको छ । यसवाहेक जिल्ला ट्राफिक प्रहरी कार्यालय (क्वाटर), प्रहरी चौकी फुलासी, प्रहरी चौकी लुभुघाट, प्रहरी चौकी खिम्ती, प्रहरी चौकी गोकुलगंगा र प्रहरी चौकी वेताली हाल भाडाको घरमा वस्दै आएका छन् । भाडाका घरमा बस्दा प्रहरी आफै असुरक्षित हुने गरेको एक प्रहरीले आफ्नो नाम नछाप्ने शर्तमा बताए ।
उनले भने– अस्थायी टहरामा वस्दा कुनै बेला हतियार हराउने होकी भन्ने चिन्ता हुन्छ । अर्कोतीर विभिन्न घटनामा संलग्न भएका व्यक्तिलाई पक्राउ गरेर ल्याएपछि राख्ने ठाउँ छैन्, एकातिर खानेपानीको समस्या छ भने अर्कोतीर शौचालयको समेत राम्रो व्यवस्थापन छैन् । जिल्लामा भन्यो भने त्यही व्यवस्था मिलाउने भन्छन्, दुःखका साथ कार्यालय चलाउँदै आएका छौं ।
यी बाहेक प्रहरी चौकी भुजी, सेलेघाट, गौश्वारा र गाल्पाले अस्थायी रुपमा टहरा निमार्ण गरी टहरावाट कार्यालय संचालन गर्दै आएको जिल्ला प्रहरी कार्यालय रामेछापका प्रहरी नायव उपरिक्षक बशन्त पाठकले जानकारी दिए । उनले भने– प्रहरी चौकीको आफ्नै भवन नहुँदा समस्या छ भने सवै प्रहरी युनिटलाई सवारीसाधन पुर्याउन सकिएको छैन् ।
