रामेछाप । पुर्व उपराष्ट्रपति नन्दकिशोर पुन पासाङको निवासमा कालो ब्यानर टाँगेको छ । भ्रष्टाचारविरोधी अभियानको सुरुवात गर्दै पूर्वउपराष्ट्रपति नन्दकिशोर पुन ‘पासाङ’को निवासमा कालो ब्यानर टाँगेको धर्मेन्द्र बाँस्तोला नेतृत्वको पार्टी नेकपा बहुमतले जनाएको छ ।
भदौ ११ मा अभियानको सुरुवात गर्दै पुनको घरमा ब्यानर टाँसेको बहुमतका केन्द्रीय सदस्य तथा बागमती प्रदेश ब्युरोका इन्चार्ज लालबहादुर बीसीले जानकारी दिए । बीसीले भने, ‘हाम्रो पार्टीका राजनीतिक कार्यक्रम अन्तर्गत भ्रष्टाचार विरुद्धको जनएकता अभियान सुरु भएको छ । ज–जसले भ्रष्टाचार गरेका छन्, तिनको घरमा कालो ब्यानर टाँगेर पर्दाफास गर्छौं ।’पुनको दहचोकस्थित स्वीट्जरल्यान्ड डाँडामा रहेको निवासमा ब्यानर राखेर विरोध जनाउन सुरु गरिएको बीसीले बताएका छन् । कालो ब्यानरमा लेखिएको छ, ‘जनयुद्धका फौजी कमान्डर र देशका उपराष्ट्रपति बनेका व्यक्तिको सुविधा सम्पन्न बंगला निर्माण गर्ने स्रोत के हो ?’
ब्यानरमा ’२०४६ यता देशका राष्ट्र प्रमुख, सरकार प्रमुख लगायत विशिष्ट व्यक्तिहरूको सम्पत्ति छानबिन गर्न दबाबका लागि जनसंघर्ष’ लेखिएको छ । पार्टीले ‘भ्रष्टाचारविरुद्ध जनएकता अभियान’ सञ्चालन गर्ने निर्णय गरेकाले सोही नीतिबमोजिम पुनको घरमा ब्यानर राखिएको र अन्य भ्रष्टहरूको घरमा पनि ब्यानर टाँस्ने अभियान जारी रहेको बीसीले बताए । बीसीले भने, ‘यहाँ कुन पार्टीको कुन व्यक्ति भन्ने छैन । भ्रष्टाचार गरेर अकुत सम्पत्ति कमाएकाहरूलाई पहिला एक्सपोज गर्नेछौँ । त्यसपछि कारबाही सुरु गर्नेछौँ ।’
