रामेछाप । संसद विघटन सँगै नेकपाको केन्द्रीय तह देखी जिल्ला तहसम्म पार्टी विभाजनको अन्तिम मोडमा पुगेसँगैै रामेछापका स्थानिय तहका प्रमुख र उप–प्रमुखहरु केही गुटमा खुलेर देखा परेका छन् भने केही कुन गुटमा लाग्ने भन्दै गुपचुपमा बसेका छन् ।
जिल्लाको ८ वटा स्थानिय तहहरु मध्ये ७ वटा स्थानिय तहमा नेकपाको वर्चश्व रहेको रामेछापमा अहिले नेकपाको विभाजन सँगै ती स्थानिय तहका जनप्रतिनिधिहरु पनि विभाजनको मोडमा पुगेका हुन् । जिल्लामा अहिले केही नेकपाको केपी ओलीको खेमातिर खुलेका छन् भने केही प्रचण्ड–माधव पक्षतर्फ खुलेर लागि परेका छन् ।
पार्टीको आन्तरिक कलहका कारण नेकपा भित्र केपी ओली समुह र प्रचण्ड–माधव समुहको दुई धारका कारण रामेछापमा पनि त्यसको असर परेको छ । पार्टीको आन्तरिक कलहले गर्दा स्थानिय तहको काम समेत केही प्रभावित हुनसक्ने नागरिक समाजका अगुवा रामचन्द्र शर्माले जानकारी दिए । पार्टी विभाजन सँगै अहिले नेकपा रामेछापमा पनि दुई धारमा विभाजन भएको छ । जसमा सुनापति गाउँपालिकाका प्रमुख धावा लामा र उपाध्यक्ष गिता विष्ट प्रचण्ड–माधव पक्षमा लागेका छन् । त्यस्तै खाँडादेवी गाउँपालिकाका प्रमुख प्रेमवहादुर तामाङ्ग केपी ओली पक्षमा लागेका छन् भने उपाध्यक्ष मखमली श्रेष्ठ प्रचण्ड–माधव खेमा लागेकी छिन् ।
त्यसैगरी दोरम्वा गाउँपालिकाका प्रमुख कमानसिंह तामाङ्ग र उपाध्यक्ष कृशला घिसिङ्ग प्रचण्ड–माधव पक्षमा लागेका छन् । त्यस्तै गोकुलगंगा गाउँपालिकाका उपाध्यक्ष राधिका श्रेष्ठ केपी ओली पक्षमा लागेकी छिन् । यसैगरी मन्थली नगरपालिकाका प्रमुख रमेशकुमार बस्नेत प्रचण्ड–माधव समुहमा खुलेका छन् भने उप–प्रमुख माया कार्की केपी ओली पक्षमा लागेकी छिन् ।
रामेछापका स्थानिय तहका प्रमुख मध्ये उमाकुण्ड गाउँपालिकाका प्रमुख शेरवहादुर सुनुवार, गोकुलगंगा गाउँपालिकाका प्रमुख खड्गबहादुर सुनुवार, लिखुतमाकोशी गाउँपालिकाका प्रमुख गोबिन्द बहादुर खड्का र उपाध्यक्ष दीपशिखा दाहाल भने अहिलेसम्म कुनै पक्षमा पनि खुलेका छैनन् । पार्टीका दुवै समुहले जिल्लामा छुट्टाछुट्टै भेलाको आयोजना गर्दा समेत उनीहरुको उपस्थित देखिएन । जिल्लामा भएका दुवै पार्टी खेमाको कार्यक्रममा आफुहरु उपस्थित नभएको उमाकुण्ड गाउँपालिकाका अध्यक्ष शेरवहादुर सुनुवारले जानकारी दिए । उनले भने– म नेकपाको एकदम बफादार सिपाही हुँ । पार्टीभित्र केन्द्र तहदेखी जिल्ला तहसम्म देखिएको बिवाद जुँगाको लडाई हो, यसमा म सहमत छैन् । यतिखेर म स्थानिय तहको निर्वाचित जनप्रतिनिधि हुँ । मैले स्थानिय तहको निर्वाचनको समयमा जनतालाई दिएको आश्वासन पुरा गर्नुपर्ने छ । अर्कोतिर स्थानिय तहको पदावधि पनि सकिन लागेको छ । पदावधि सकिएपछि मात्रै कता लाग्ने भन्ने बिषयमा टुङ्गो लगाउने अध्यक्ष सुनुवारले वताए ।
पार्टीको विभाजन सँगै कुन पक्षमा लाग्ने बिषयमा अहिले आफु तत्काल केही नबोल्ने गोकुलगंगा गाउँपालिकाका अध्यक्ष खड्गबहादुर सुनुवारले जानकारी दिए । उनले भने– अहिले म कतै पनि खुलेको छैन् । अहिले मेरो समय भनेको पर्ख र हेरको अवस्था हो, मैले अहिले यती मात्रै भने । स्थानिय तहका जनप्रतिनिधिसँगै रामेछापमा संघीय र प्रदेश सांसद लाई पनी पार्टी विभाजनले छुट्टयाएको छ । संघीय सांसद श्यामकुमार श्रेष्ठ र प्रदेश सांसद शान्तिप्रसाद पौडेल प्रचण्ड–माधव पक्षमा देखिएका छन् भने अर्का प्रदेश सांसद कैलाश प्रसाद ढुगेल केपी ओली पक्षमा लागेका छन् ।