काठमाण्डौं । बागमती प्रदेशको मुख्य मन्त्री बहादुर सिंह लामा बन्ने भएका छन् । नेपाली काँग्रेस बागमती प्रदेश संसदियदलका नेता बागमती प्रदेशको मुख्य मन्त्री बन्ने लगभग टुगो लागेको छ । नेपाली काँग्रेस र नेकपा एमाले बिच भएको सहमति कार्यान्वयन भए बागमतीमा काँग्रेसबाट सरकारको नेतृत्व गर्ने बहादुर सिंह लामा पहिलो व्यक्ति हुनेछन् ।
सङ्घीयतापछि निर्माण भएका प्रदेश सभामा सरकारमा मधेस र बागमतीमा काँग्रेसले सरकारको नेतृत्व गर्न हालसम्म पाएको थिएन । बागमतीमा पहिलो दल बने पनि यस पटक पनि काँग्रेसले सरकार बनाउने अवसर प्राप्त गरेन । गठबन्धनको आडमा यी दुई बाहेकका प्रदेशमा काँग्रेसले सरकारको नेतृत्व गरिसकेको छ । केन्द्रीय राजधानी रहेको बागमती प्रदेशमा काँग्रेसले सरकारको नेतृत्व गर्न पाउने अवसर सात वर्षपछि अब भने जुरेको छ । यसबिचमा एमालेबाट डोरमणि पौडेल र अष्टलक्ष्मी शाक्य, एकीकृत समाजवादीबाट राजेन्द्र पाण्डे र माओवादी केन्द्रबाट सालिकराम जमरकट्टेल मुख्यमन्त्री बने । अघिल्लो संसदमा तेस्रो शक्ति रहेको काँग्रेस हाल पहिलो दल बन्दा समेत सरकारको नेतृत्व गर्न पाएन ।
काँग्रेस सत्तामा पुग्न नसक्नुमा केन्द्रमा सत्ता केन्द्रित गठबन्धन परिवर्तन हुनु प्रमुख कारण बनेको छ । साथै, केन्द्रमा हुने भागबन्डामा काँग्रेसका हिस्सामा बागमती प्रदेश सरकारको नेतृत्व नपाउनु पनि कारण बनेको छ । १७ असारमा काँग्रेस र एमालेबिच भएको सहमतिअनुसार दुई ठुला दलले ३÷३ प्रदेशको सरकारको नेतृत्व गर्ने भएका छन् । काँग्रेसले बागमती, गण्डकी र सुदूरपश्चिम प्रदेश सरकारको नेतृत्व गर्नेछ । पहिलो दल बनेको प्रदेशमा काँग्रेसले सरकार बनाउने गरी सहमति बनेको छ । दुई ठुला दलको सत्ता सहकार्यले मात्रै बागमतीमा काँग्रेस सरकारको नेतृत्व गर्ने अवस्था बनेको छ ।
काँग्रेस ठुलो दल हुनुको साथै माओवादीले बागमती छोड्नै पर्ने अवस्थामा काँग्रेसको भागमा पर्नु स्वाभाविक भएको नेता एनपी साउद बताउँछन् । एमाले पहिलो दल भएको मधेस जनमतलाई दिएर काँग्रेस पहिलो बनेको कर्णाली एमालेले आफ्नो भागमा राखेको छ ।
‘
