रामेछाप । जिल्ला समन्वय समिति रामेछापमा रहेको ५ लाख रुपैयाँ वजेट सक्न समन्वय प्रमुख तथा पदाधिकारी र कर्मचारीहरु कार्यलयकाे काम छाडेर एक हप्ते मन्दीर भ्रमणमा निस्किएका छन् ।
समन्वय समितिका पदाधिकारीहरुको म्याद सकिन लाग्दा कार्यालयमा भएको बजेट सक्ने उद्धेश्यले उनीहरु बाह्य जिल्ला भ्रमणमा निस्किएका हुन् । एकहप्ता लामो भ्रमणमा निस्किएका समन्वयका पदाधिकारी र उनीहरुका आफन्त तथा समन्वय अधिकारी र केही कर्मचारीहरु समेत गरि करिव डेढ दर्जन व्यक्तिहरु भ्रमणमा गएका हुन् ।
जिल्ला समन्वय समितिमा पदाधिकारी आएको करिव साढे चार बर्ष बितिसक्दा जिल्लामा हुने विभिन्न विकास निमार्ण लगाएका कामको अनुुगमन, दर्ता विना नै संचालन भएका क्रसर उद्योग, नदी दोहन जस्ता जटिल बिषयमा काम गर्न नसकेर मुक दर्शक भएर बसेका पदाधिकारीहरु कार्यालयमा भएको बजेट सक्न भने तम्सीएका छन् ।
सरकारले भ्रमण लगाएतका शिर्षकमा खर्च नगर्न निर्देशन गरेको भएता पनि सरकारले गरेको परिपत्रलाई लत्याउँदै समन्वय समितिका पदाधिकारीहरु भ्रमणमा गएका हुन् । उनीहरुले प्युठानको स्वर्गद्धारी मन्दीर र अन्य मठमन्दीरहरु, अर्घाखाची जिल्लामा भएका मन्दीरहरु र अन्य स्थानहरुको भ्रमण गरेर रकम सक्ने गरि गएको जिल्ला समन्वय समितिका एक कर्मचारीले जानकारी दिए ।
उनले भने– अहिले भ्रमण नगर्दा ५ लाख रुपैयाँ रकम जोगिन भन्दै उक्त रकम जसरी भएपनि आफ्नै कार्यकालमा सक्ने भन्ने प्रमुख लगाएतका पदाधिकारीले जिद्धी गरेपछि जम्वो टोली भ्रमणमा गएका हुन् । भ्रमणमा जाने रकमले समन्वयमा अन्य काम गर्न सकिन्थ्यो । कार्यालयमा गर्नुपर्ने काम धेरै छन् । कार्यालयको काम भन्दा पनि भ्रमणमा पदाधिकारीहरुको मोह रहेको पनि ती कर्मचारीले बताए ।
सरकारले सबै सरकारी कार्यालयहरुलाई फजुल खर्च नगर्न र देश तथा विदेश भ्रमण लगाएतका कार्यहरु नगर्न निर्देशन दिदा दिदै जिल्ला समन्वय समितिका पदाधिकारी बाह्रय जिल्ला भ्रमणमा निस्कनु गलत भएको नागरिक समाजका अगुवा हिमाल ढुंगेलले जानकारी दिए । उनले भने– सरकारी बजेट सक्न मठमन्दिर भ्रमण गर्नु र निजी कामको लागि सरकारी पैसा सक्नु भनेको सरकारको खिल्ली उडाउनु मात्रै हैन । यो भ्रमणले सरकारी कोषको समेत चरम दुरुपयोग भएको बताए ।
जिल्ला समन्वय समितिमा रहेका एक÷दुई कर्मचारी वाहेक सबै कर्मचारी पनि भ्रमणमा गएका छन् । कार्यालयमा ५ लाख वजेट थियो । त्यो वजेट सक्ने गरि समन्वय समितिका पदाधिकारी र कर्मचारीहरु भ्रमणमा निस्किएको जिल्ला समन्वय समितिका सूचना अधिकारी रीता रेग्मी (तिवारी)ले जानकारी दिइन ।
उनले भनिन्– भ्रमणमा गएको टोलीले प्युठान र अर्घाखाची घुम्ने कुरा छ । बजेट बाँकी रहेको खण्डमा अन्य आसपासका जिल्लाहरु समेत घुमेर आउने कार्यक्रम रहेको बताइन ।
