४ भदौ, काठमाडौं । तीन वर्षअघि दुई नेपाली युवा सौरभ सुवेदी र प्रज्वल शर्माले सुरु गरेको प्रविधि स्टार्टअप एडेक्स इन्टरनेसनल अमेरिकी कम्पनी टेकबे डिजिटलले २४ लाख अमेरिकी डलर, अर्थात् करिब ३३ करोड रुपैयाँमा खरिद गरेको छ ।
एडेक्सको सम्पूर्ण सेयर खरिद गर्न टेकबे डिजिटलसँग सम्झौता सम्पन्न भएको कम्पनीले विज्ञप्तिमार्फत जनाएको छ । छोटो समयमै अमेरिकी प्रविधि कम्पनीमा गाभिनु नेपालको प्रविधि क्षेत्रमा महत्वपूर्ण उपलब्धि भएको विज्ञप्तिमा उल्लेख छ । “यो सम्झौता दुवै कम्पनीको विकासमा महत्त्वपूर्ण क्षण हो, जसले विश्व प्रविधि बजारमा नेपालको उपस्थिति प्रभावशाली हुँदै गएको संकेत गर्छ,” विज्ञप्तिमा भनिएको छ ।
सन् २०२० मा चार्टर्ड एकाउन्टेन्ट सौरभ सुवेदी र एरोस्पेस इन्जिनियर प्रज्वल शर्माले स्थापना गरेको एडेक्सले क्लाउड कन्सल्टिङ, एडब्लुएस कन्सल्टिङ र डेभओप्स कन्सल्टिङ क्षेत्रमा काम गर्दै आएको छ । कम्पनीले २०२२ को मध्यतिर मात्रै औपचारिक रूपमा सेवा सुरु गरेको भए पनि तीन वर्षको छोटो अवधिमै नेपालकै अग्रणी क्लाउड कन्सल्टिङ कम्पनी बन्न सफल भएको दाबी गरिएको छ । हालसम्म यसले ६० भन्दा बढी सीपयुक्त रोजगारी सिर्जना गरेको कम्पनीले जनाएको छ ।
संस्थापक सुवेदी भारतमा सीए पढेर फर्किएका हुन् भने शर्माले बेलायतमा एरोस्पेस इन्जिनियरिङ अध्ययन गरेका थिए । नेपालमै प्रविधि क्षेत्रमा सम्भावना देखेर एडेक्स स्थापना गरेको उनीहरूको भनाइ छ । सुवेदी भन्छन्, “तीन वर्षमै एक फस्टाउँदै गएको टेक बिजनेस निर्माण गर्नु हाम्रा लागि उल्लेखनीय यात्रा हो ।”
टेकबे डिजिटलसँग सम्बद्ध अर्को कम्पनीका लागि काम गर्दा उनीहरूले एडेक्सको कार्यालय, कर्मचारीको क्षमता र गुणस्तरलाई उच्च मूल्यांकन गरेपछि खरिदको प्रस्ताव आएको सुवेदीले खुलाए । उनका सहसंस्थापक शर्माले पनि यो सम्झौताले एडेक्सलाई नयाँ उचाइमा पुर्याउने विश्वास व्यक्त गर्दै भने, “टेकबे डिजिटलसँग मिलेर हामी अझ ठूलो बजारमा प्रवेश गर्नेछौं ।”
नेपाल आउटसोर्सिङको केन्द्र बन्दै गएका कारण टेकबेले पनि यहाँ ब्याक अफिस राख्न रुचि देखाएको सुवेदीको भनाइ छ । टेकबे स्वयं पनि क्लाउड कन्सल्टिङ क्षेत्रमा काम गरिरहेको हुँदा एडेक्सप्रति उनीहरूको रुचि स्वाभाविक भएको उनले बताए ।
कम्पनीको सेयर चरणबद्ध रूपमा हस्तान्तरण हुनेछ । विज्ञप्तिअनुसार ६ देखि ८ महिनाभित्र सम्पूर्ण सेयर हस्तान्तरण भइसकेको हुनेछ । भुक्तानी पनि त्यही अवधिमा किस्ताबन्दी गरेर हुने सहमति भएको जनाइएको छ ।
