रामेछाप । आगामी फागुन २१ गते हुने प्रतिनिधिसभा सदस्य निर्वाचनमा रामेछापबाट नेपाली कांग्रेस ले ऐतिहासिक विजय हासिल गर्ने दाबी गरिएको छ । कांग्रेस बागमती प्रदेश कार्यसमितिका प्रवक्ता तिलक रुवाली ले निर्वाचन केवल मतदान प्रक्रिया मात्र नभई देशलाई अस्थिरता र वैचारिक विचलनबाट मुक्त गराउने महत्वपूर्ण अवसर भएको बताएका छन् ।
निर्वाचनको पूर्वसन्ध्यामा रामेछापको सदरमुकाम मन्थलीमा आयोजित कार्यक्रमलाई सम्बोधन गर्दै उनले देशभर कांग्रेसको पक्षमा जनलहर सिर्जना भइरहेको र रामेछापमा त्यसको प्रभाव अझ स्पष्ट रूपमा देखिएको बताए । उनका अनुसार पार्टीले स्पष्ट बहुमतका साथ विजय हासिल गर्ने गरी संगठनात्मक तयारी र चुनावी रणनीति अघि बढाइसकेको छ ।
रुवालीले रामेछापको विकास निर्माणमा कांग्रेसले खेलेको ऐतिहासिक भूमिकाको चर्चा गर्दै गाउँ–गाउँमा सडक विस्तार, शिक्षा र स्वास्थ्यका पूर्वाधार निर्माण तथा जलविद्युत परियोजनालाई अघि बढाउन पार्टीको योगदान महत्वपूर्ण रहेको बताए । उनले बीपी कोइरालाको समाजवादी चिन्तन र वर्तमान आवश्यकताअनुसार आर्थिक विकास तथा समृद्धिको नेतृत्व कांग्रेसले मात्रै गर्न सक्ने तर्क गरेका छन् ।
कम्युनिष्ट शक्तिहरूमाथि टिप्पणी गर्दै उनले जनतालाई देखाइएका धेरै सपना केवल सत्तामा पुग्ने माध्यम मात्र भएको दाबी गरे । उनका अनुसार विगतका राजनीतिक घटनाक्रमले कम्युनिष्ट घटकहरूको व्यवहार जनतामाझ स्पष्ट भइसकेको छ ।
रुवालीले अहिले मुलुकको अर्थतन्त्रलाई सही मार्गमा ल्याउन, युवालाई रोजगारीका अवसर सिर्जना गर्न तथा रामेछाप जस्तो कृषि र जलस्रोतको सम्भावना भएको जिल्लामा आधुनिक कृषि र पर्यटन विकासलाई अघि बढाउन कांग्रेसको नेतृत्व आवश्यक रहेको बताएका छन् ।
कार्यक्रममा उपस्थित नेता तथा कार्यकर्तालाई उनले सामाजिक सञ्जाल र विभिन्न माध्यमबाट फैलाइएका भ्रमहरूलाई गाउँ–गाउँमा पुगेर चिर्न आग्रह गरेका थिए । उनले पार्टीभित्र रहेका सानातिना असन्तुष्टि र मनमुटावलाई थाँती राखेर लोकतन्त्रको रक्षा र कांग्रेसको विजयका लागि एकताबद्ध भएर लाग्न निर्देशन दिएका छन् । उनले फागुन २१ को निर्वाचनलाई नयाँ राजनीतिक दिशा दिने अवसरका रूपमा लिँदै मतदातालाई विवेकपूर्ण निर्णय गर्न समेत आग्रह गरेका छन् ।
