काठमाडौं । रामेछाप सम्पर्क समिति दक्षिण कोरिया–नेपालको प्रथम वार्षिक साधारण सभा तथा अधिवेशन शनिबार काठमाडौंमा सम्पन्न भएको छ। संस्थाका अध्यक्ष भीम खड्काको अध्यक्षतामा आयोजित कार्यक्रमको उद्घाटन प्रतिनिधिसभा सदस्य तथा अर्थ समितिका सभापति कृष्णहरी बुढाथोकीले गरेका थिए।
अधिवेशनले पुरुषोत्तम गौतमको अध्यक्षतामा नयाँ कार्यसमिति सर्वसम्मत रूपमा चयन गरेको छ। समितिको उपाध्यक्षमा नरबहादुर तामाङ र विदुर खड्का, महासचिवमा पुष्करप्रसाद घिमिरे, सचिवमा पवित्रा भण्डारी तथा कोषाध्यक्षमा मेघराज खड्का चयन भएका छन् । त्यसैगरी सदस्यहरूमा कृष्ण गौतम, राजनप्रसाद प्रसाई, नवराज अधिकारी र सुजन श्रेष्ठ चयन भएको संस्थाले जनाएको छ।
कार्यक्रममा प्रतिनिधिसभा अन्तर्गत अर्थ समितिका सभापति कृष्णहरी बुढाथोकी, बागमती प्रदेशसभा सदस्य युवराज चौलागाईं, पूर्व प्रदेशमन्त्री तथा एमाले नेता शान्तिप्रसाद पौडेल, नेपाली कांग्रेसका युवा नेता रामकृष्ण खड्का, राष्ट्रिय स्वतन्त्र पार्टीका होमबहादुर कार्की, साहित्यकार अमरदीप सुनुवार तथा चण्डेश्वर चौलागाईंले शुभकामना मन्तव्य व्यक्त गरेका थिए।
वक्ताहरूले विदेशमा रहेका रामेछापेलीबीच आपसी एकता, सहकार्य र समन्वय आवश्यक रहेको उल्लेख गर्दै संस्थाले सामाजिक सेवासँगै जिल्लाको विकास र पहिचान प्रवर्द्धनमा समेत योगदान पुर्याउनुपर्ने धारणा राखेका थिए।
रामेछाप जिल्लामा स्थायी ठेगाना भएका तथा रोजगारी, अध्ययन र विभिन्न पेशागत सिलसिलामा दक्षिण कोरियामा रहेका व्यक्तिहरूबीच आपसी सम्बन्ध विस्तार गर्ने, समस्या समाधानमा सहजीकरण गर्ने तथा सामाजिक विकासका क्षेत्रमा योगदान पुर्याउने उद्देश्यले संस्था स्थापना गरिएको जनाइएको छ।
