रामेछाप । प्रतिनिधिसभा निर्वाचनका उम्मेदवार श्यामकुमार श्रेष्ठले जिल्लामा भएका पुल, सडक तथा शैक्षिक पूर्वाधार निर्माणका महत्वपूर्ण काम आफ्नो सक्रिय पहल र नेतृत्वमा सम्पन्न भएको दाबी गरेका छन् । पार्टी कार्यालय मन्थलीमा आयोजित विशेष पत्रकार सम्मेलनमा बोल्दै उनले विगतमा जनप्रतिनिधिका रूपमा रहँदा जिल्लाको समग्र विकासका लागि आफूले प्रभावकारी भूमिका निर्वाह गरेको बताएका हुन् ।
श्रेष्ठले विशेषगरी खुर्कोट–मन्थली सडकको निर्माण तथा कालोपत्रे, हाल निर्माणाधीन अवस्थामा रहेको सेलेघाट–साँघुटार सडकसहित जिल्लाका विभिन्न ग्रामीण सडक विस्तार र स्तरोन्नतिमा आफ्नो निरन्तर चासो र पहल रहेको जिकिर गरे । उनका अनुसार ती योजनाहरूलाई प्राथमिकतामा राखेर सम्बन्धित निकायमा निरन्तर पहल गरेकै कारण काम अघि बढ्न सम्भव भएको हो ।
त्यस्तै, जिल्लालाई बाहिरी जिल्लासँग जोड्ने रणनीतिक महत्वका पुल निर्माणमा समेत आफ्नो भूमिका रहेको उनले उल्लेख गरे । खुर्कोट, तामाकोशी, सुनकोशी, सित्खालगायत क्षेत्रमा पक्की पुल निर्माणका लागि बजेट सुनिश्चित गर्न र काम अघि बढाउन आफूले समन्वय गरेको उनको भनाइ थियो ।
शिक्षा क्षेत्रतर्फ पनि आफ्नो योगदान उल्लेखनीय रहेको दाबी गर्दै श्रेष्ठले मन्थलीमा क्याम्पस सञ्चालन, प्राविधिक शिक्षालय स्थापना तथा विभिन्न विद्यालयको भौतिक पूर्वाधार विकासमा आफूले विशेष पहल गरेको बताए । स्वास्थ्य र शिक्षालाई जिल्लाको दीर्घकालीन विकासको आधार मानेर काम गरेको उनको भनाइ थियो ।
पूर्व संविधानसभा सदस्य, संघीय सांसद तथा पूर्व गृह राज्यमन्त्रीसमेत रहेका श्रेष्ठले आफू सधैं इमानदार राजनीति र जनताको हितलाई केन्द्रमा राखेर अघि बढेको दाबी गरे । विगतका कामको मूल्यांकनकै आधारमा यस पटक पनि रामेछापेली जनताले विश्वासका साथ मतदान गर्नेमा आफू विश्वस्त रहेको उनले बताए ।
कार्यक्रममा पार्टीका केन्द्रीय सदस्य देवशंकर पौडेल, नेता होम बुढाथोकी, प्रचार विभाग संयोजक झम्क कडेललगायत नेता तथा कार्यकर्ताको उपस्थिति रहेको थियो । कार्यक्रममा पार्टीले निर्वाचन लक्षित घरदैलो अभियानलाई विभिन्न स्थानमा अघि बढाइसकेको र आगामी दिनमा थप सशक्त रूपमा अभियान सञ्चालन गरिने जानकारी पनि दिइएको थियो ।
