रामेछाप, २२ भदौ । नेपाल प्रेस युनियन रामेछापको अध्यक्षमा कुमार श्रेष्ठ निर्विरोध निर्वाचित हुनुभएको छ।
शनिबार सम्पन्न युनियनको ५औँ जिल्ला अधिवेशनले श्रेष्ठको नेतृत्वमा ११ सदस्यीय नयाँ कार्यसमिति निर्विरोध निर्वाचित गरेको हो।
नवनिर्वाचित कार्यसमितिको उपाध्यक्षमा सागर बोहरा, महिला उपाध्यक्षमा सम्झना खड्गी, सचिवमा मिलन विक, सहसचिवमा टंकनाथ गौतम र कोषाध्यक्षमा राजन महतारा निर्वाचित हुनुभएको छ।
त्यस्तै, सदस्यहरूमा श्रीराजा चन्द्र महत, ईश्वर विक, अनिता रसाइली, कर्ण श्रेष्ठ र सुशिला बुढाथोकी निर्वाचित हुनुभएको छ।
अधिवेशनबाट निर्विरोध नयाँ नेतृत्व चयन भएपछि नवनिर्वाचित कार्यसमितिलाई बधाई तथा सफल कार्यकालको शुभकामना दिइएको छ।
अध्यक्षमा निर्वाचित श्रेष्ठले पत्रकारको पेशागत हकहित, क्षमता अभिवृद्धि तथा प्रेस स्वतन्त्रताको संरक्षणलाई प्राथमिकतामा राखेर काम गर्ने प्रतिबद्धता व्यक्त गर्नुभएको छ। उहाँले जिल्लामा क्रियाशील पत्रकारबीच सहकार्य र एकता कायम गर्दै पत्रकारितालाई थप जिम्मेवार, मर्यादित र व्यावसायिक बनाउन युनियनले भूमिका निर्वाह गर्ने बताउनुभयो।
नयाँ कार्यसमितिले पत्रकारहरूको पेशागत सुरक्षा, क्षमता विकास तथा पत्रकारिताको संस्थागत विकासका क्षेत्रमा प्रभावकारी काम गर्ने अपेक्षा गरिएको छ।
