रामेछाप । गोकुलगंगा गाउँपालिकाले आगामी आर्थिक वर्ष २०८३र८४ का लागि ६३ करोड ५ लाख २० हजार २ सय ७६ रुपैयाँ बराबरको बजेट प्रस्तुत गरेको छ। गाउँपालिकाको १९ औँ गाउँसभामा उपाध्यक्ष उषा देवी कार्की द्वारा प्रस्तुत बजेटले शिक्षा, स्वास्थ्य, कृषि, रोजगारी, खानेपानी तथा पूर्वाधार विकासलाई मुख्य प्राथमिकतामा राखेको छ।
गाउँसभामा प्रस्तुत बजेट तथा कार्यक्रमले गाउँपालिकाको आर्थिक, सामाजिक, सांस्कृतिक, शैक्षिक र कृषि क्षेत्रको रूपान्तरणमा महत्वपूर्ण योगदान पुग्ने अपेक्षा गरिएको छ। गाउँपालिकाले विकासका आधार तयार गर्दै सुशासनमैत्री सेवा प्रवाहमार्फत नागरिकलाई प्रत्यक्ष लाभ पुर्‍याउने लक्ष्य लिएको जनाएको छ।
बजेट प्रस्तुत गर्दै उपाध्यक्षले नेपालको विभिन्न राजनीतिक आन्दोलन तथा जनआन्दोलनमा जीवन उत्सर्ग गर्ने ज्ञात–अज्ञात शहीदहरूप्रति श्रद्धाञ्जली व्यक्त गरेका थिए। साथै आन्दोलनका क्रममा घाइते भएकाहरूको स्वास्थ्यलाभको कामना समेत गरिएको थियो।
गाउँपालिकाले आगामी वर्षको बजेटका लागि आन्तरिक आयबाट ७ करोड ८२ लाख ९ हजार ५ सय ११ रुपैयाँ, संघीय सरकारको वित्तीय हस्तान्तरण तथा राजस्व बाँडफाँटबाट ४६ करोड ३६ लाख ८३ हजार रुपैयाँ तथा प्रदेश सरकारको वित्तीय हस्तान्तरण र राजस्व बाँडफाँटबाट ८ करोड ८६ लाख २७ हजार ७ सय ६५ रुपैयाँ आम्दानी हुने अनुमान गरेको छ।
यसअघि चालु आर्थिक वर्ष २०८२र८३ का लागि संशोधनसहित ५७ करोड २४ लाख ३४ हजार १७ रुपैयाँ बराबरको आय–व्यय अनुमान गरिएकोमा हालसम्म ५२ करोड ९७ लाख १३ हजार ९ सय १७ रुपैयाँ आम्दानी भएको गाउँपालिकाले जनाएको छ।
व्ययतर्फ चालु आर्थिक वर्षमा चालु खर्चका लागि ३९ करोड ११ लाख ७४ हजार १७ रुपैयाँ विनियोजन गरिएकोमा हालसम्म २४ करोड ५३ लाख ९१ हजार ४ सय ८३ रुपैयाँ खर्च भएको छ, जुन कुल विनियोजनको करिब ६३ प्रतिशत हो। यस्तै पूँजीगततर्फ १८ करोड १२ लाख ६० हजार रुपैयाँ विनियोजन गरिएकामा हालसम्म ८ करोड २२ लाख ६१ हजार ८ सय ११ रुपैयाँ खर्च भएको छ, जुन करिब ४५ प्रतिशतभन्दा बढी रहेको छ।
गाउँपालिकाले आगामी वर्षको बजेट कार्यान्वयनका क्रममा शिक्षा, स्वास्थ्य, कृषि उत्पादन वृद्धि, रोजगारी सिर्जना, खानेपानी विस्तार, दिगो पूर्वाधार निर्माण, ऐतिहासिक तथा मौलिक सांस्कृतिक सम्पदाको संरक्षण र विकासलाई विशेष प्राथमिकता दिएको जनाएको छ। साथै निजी क्षेत्रसँगको सहकार्य, लैङ्गिक समानता तथा सामाजिक समावेशीकरणलाई पनि बजेटका प्रमुख आधारका रूपमा समेटिएको छ।
गाउँपालिकाका अनुसार प्रस्तुत बजेटले स्थानीय स्रोत र साधनको अधिकतम उपयोग गर्दै समृद्ध गोकुलगंगा निर्माणको आधार तयार गर्ने अपेक्षा गरिएको छ।