रामेछाप । नेकपा (एमाले) रामेछापले आगामी फागुन २१ गते हुने प्रतिनिधिसभा निर्वाचनलाई लक्षित गर्दै घरदैलो अभियानदेखि प्रचार–प्रसारसम्मका गतिविधिलाई तीव्र बनाउने निर्णय गरेको छ । जिल्ला कमिटीको विस्तारित बैठकले पार्टीका सबै तह र जनसंगठनलाई निर्वाचन केन्द्रित परिचालनमा सक्रिय बनाउने निष्कर्ष निकालेको हो ।
जिल्ला कमिटी अध्यक्ष पुरुषोत्तम कडरियाको अध्यक्षतामा तथा केन्द्रीय कमिटी सदस्य एवं प्रतिनिधिसभा उम्मेदवार माधवप्रसाद ढुङ्गेलको प्रमुख आतिथ्यतामा मन्थलीमा सम्पन्न बैठकले निर्वाचन कार्यक्रमलाई व्यवस्थित, प्रभावकारी र आक्रामक ढंगले सञ्चालन गर्ने रणनीति तय गरेको प्रचार तथा प्रकाशन विभाग प्रमुख राकेश श्रेष्ठले जानकारी दिए ।
बैठकले प्रतिनिधिसभा प्रत्यक्षतर्फ सूर्य चिन्हका उम्मेदवार ढुङ्गेल र समानुपातिकतर्फ राजकुमार श्रेष्ठलाई विजय गराउन व्यापक जनपरिचालन गर्ने निर्णय गरेको छ । यसका लागि घरदैलो, टोलभेला, वडा स्तरका कार्यक्रम, युवासँग अन्तरक्रिया, महिला तथा जनवर्गीय संगठनमार्फत मतदाता भेटघाटलाई तीव्र बनाइने जनाइएको छ ।
निर्वाचन अभियानलाई सशक्त बनाउन जिल्ला कमिटी अध्यक्ष कडरियाको संयोजकत्वमा ५५१ सदस्यीय प्रतिनिधिसभा निर्वाचन मूल परिचालन कमिटी गठन गरिएको छ । त्यसैगरी आवश्यक समन्वय र अभियानको प्रभावकारी कार्यान्वयनका लागि उम्मेदवार ढुङ्गेलको संयोजकत्वमा संयोजन तथा समन्वय संयन्त्र समेत निर्माण गरिएको छ । संयन्त्रमा केन्द्रीय कमिटी सदस्य गीता कार्की, पूर्व केन्द्रीय सल्लाहकार परिषद् सदस्य कमलप्रकाश सुनुवार, समानुपातिक उम्मेदवार राजकुमार श्रेष्ठ लगायत प्रदेश र जिल्लास्तरका नेता समेटिएका छन् ।
निर्वाचन खर्च व्यवस्थापन तथा स्रोत परिचालनलाई व्यवस्थित गर्न उपाध्यक्ष होतराज ढकालको संयोजकत्वमा आर्थिक उपसमिति गठन गरिएको छ भने प्रचार–प्रसारलाई प्रभावकारी बनाउन राकेश श्रेष्ठको संयोजकत्वमा ४१ सदस्यीय प्रचार–प्रसार उपसमिति गठन गरिएको बैठकले जनाएको छ । उपसमितिमा पार्टीका प्रचारकर्मी, पालिका कमिटीका प्रतिनिधि, प्रेस चौतारी नेपालसँग आबद्ध पत्रकार तथा विभिन्न सञ्चार माध्यममा कार्यरत व्यक्तिहरूलाई समेटिएको छ ।
बैठकले पार्टी निर्देशन विपरीत गतिविधि गरेको र अनुशासन उल्लङ्घन गरेको निष्कर्षसहित जिल्ला कमिटी सदस्य लवहरि बुढाथोकी र राजकुमार मैनालीलाई जिम्मेवारीबाट बर्खास्त गर्दै सदस्यता निलम्बन गर्ने निर्णय समेत गरेको जनाएको छ ।
एमाले रामेछापले अब निर्वाचनसम्म जिल्लाभरका सबै पालिका, वडा र टोलस्तरमा संगठन परिचालनलाई तीव्र पार्दै मतदाता केन्द्रित अभियान सञ्चालन गर्ने जनाएको छ ।
