रामेछाप । नवजागरण बचत तथा ऋण सहकारी संस्था र ओम स्टोर्स एण्ड सप्लायर्स १२ औँ राष्ट्रिय कर दिवसको अवसरमा सम्मानीत भएको छ । १२ औँ राष्ट्रिय कर दिवस सप्ताहको अवसर पारेर करदाता सेवा कार्यालय मन्थलीले नवजागरण बचत तथा ऋण सहकारी संस्था मन्थली र ओम स्टोर्स एण्ड सप्लायर्स मन्थलीलाई सम्मान गरेको हो ।
नवजागरण सहकारीको सम्मान पत्र सहकारीका अध्यक्ष श्याम थापा र ओम स्टोर्स एण्ड सप्लायर्सको सम्मान पत्र प्रोप्राइटर लक्ष्मी थापाले ग्रहण गरेका हुन् । सम्मानित साकोस र सप्लायर्सलाई कर सप्ताह दिवसको समापनका दिन बिहीबार प्रमुख जिल्ला अधिकारी अनिता निरौलाले सम्मान गरेका हुन् ।
करदाता सेवा कार्यालय मन्थलीले प्रत्यक सबै भन्दा बढी कर तिर्ने वर्ष एक व्यवसायि र बैङ्क तथावित्तीय संस्थाहरूलाई सम्मान गर्दै आएको छ । सो अवसरमा प्रमुख जिल्ला अधिकारी निरौलाले नागरिकहरुले तीरेको करबाटै राज्यको विकासमा टेवा पुग्ने भन्दै सबै करदाताहरूले स्वत:स्फूर्त ढङ्गले कर तिर्ने वातावरण सृजना गर्नका लागि राज्यको भूमिका प्रभावकारी हुनु पर्नै बताइन् । राज्यले ब्यवसायीहरुलाई व्यवसाय गर्नका लागि आवश्यक वातावरण निर्माण गर्नु पर्ने र व्यवसायीहरूले अनिवार्य रूपमा कर तिर्नका लागि सम्मानित वातावरण निर्माण हुन पर्ने भन्दै त्यसको लागि आफूले सहयोग गर्ने प्रतिबद्धता गरेकी छिन् ।
सम्मानित संस्था र व्यक्तिहरूले गत आर्थिक वर्ष २०७८/०७९ मा जिल्ला भरिका कारोबारी करदाता मध्य सबै भन्दा बढी कर तिरेको आधारमा सम्मान पाएका हुन् ।
कर दाता सेवा कार्यालय मन्थलीका प्रमुख एवं कर अधिकृत राजन मणि शर्माको अध्यक्षतामा भएको उक्त करदाता सप्ताह कार्यक्रमका अवसरमा करदाता सेवा कार्यालय मन्थलीले विभिन्न सञ्चार माध्यमबाट कर सम्बन्धी जनचेतना मूलक कार्यक्रमको प्रचार प्रसार, रामेछाप नगरपालिकामा कर सम्बन्धी अभिमुखीकरण र उत्कृष्ट कर दाखिला गर्नेहरूलाई कार्यालय परिसर भित्र सम्मान गरी दिवस मनाएको जानकारी गराएको छ । आफ्नो कार्यालयमा आउने सेवाग्राहीहरूलाई कार्यालय सम्मानित र उत्कृष्ट सेवा दिन तयार रहेको भन्दै उक्त अभियानमा साथ दिन सबै सरोकारवाला पक्षलाई आग्रह गरेको छ ।
कार्यक्रमका अवसरमा सम्मानित संस्था नवजागरण सा कोसका तर्फबाट बोल्दै अध्यक्ष श्याम थापाले राज्यले अन्य मुलुकहरूमा जस्तै कर लाई रहरको रूपमा तिराउने वातावरण सृजना गर्नु पर्ने र ब्यवसयीहरुले पनि करलाई आफ्नो अनिवार्य दायित्वको विषयका रूपमा लिने वातावरण सृजना गर्न आग्रह गरेको छ ।
कार्यक्रमका अवसरमा नेपाल पत्रकार महासङ्घ रामेछापका अध्यक्ष बद्री नयाँघरे, जिल्ला सहकारी संघ रामेछापका अध्यक्ष हिमाल ढुङ्गेल र रामेछाप उद्योग वाणिज्य सङ्घका अध्यक्ष नवीन थापामगर लगायतका वक्ताहरूले करदाताहरूले राज्यलाई तिर्ने करलाई रहरको रूपमा तिर्नु पर्ने वातावरण राज्य पक्षले सृजना गर्नु पर्ने धारणा राखेका छन् ।
