काठमाण्डौं । स्वास्थ्य तथा जनसङ्ख्यामन्त्री प्रदीप पौडेलले सरकारले जनशक्ति र उपकरण व्यवस्थापनमा ध्यान दिने बताउनु भएको छ । अस्पताल भवन मात्रै नभई सेवा प्रवाहका लागि उपकरण र जनशक्ति आवश्यक रहेकोले अब सरकारले जनशक्ति र उपकरण व्यवस्थापनमा ध्यान दिने बताउनु भएको हो ।
हालै निर्माण गरिएको बागलुङको काठेखोला गाउँपालिका–६ स्थित पाँच शय्याको बिहुँकोट आधारभूत अस्पतालको आज उद्घाटन कार्यक्रममा सम्बोधन गर्दै देशभर हालै बनेका ४७ वटा भवनबाट सहज सेवा प्रवाहका लागि त्यहाँ जनशक्ति र उपकरण व्यवस्थापनमा सरकारले ध्यान दिने बताउनु भयो ।
मन्त्री पौडेलले जनशक्ति र उपकरण बिना भवनले सेवा दिन नसक्ने भदै स्वास्थ्य सुविधा दिन सरकारले लगानी बढाउँदै लगेको बताउनु भयो । उहाँले तीन तहकै सरकारले स्वास्थ्य, शिक्षाजस्ता सेवामा लगानी गरेको र एउटा नागरिकले तीन तहबाटै सेवा पाउनु संघीयताको सबल पक्ष रहेको धारणा राख्नु भएको छ । “हाल नागरिकले तीनै तहबाट स्वास्थ्य र शिक्षामा सुविधा पाउन थालेका छन् तर यो पर्याप्त छैन । स्रोत अभावले देखिएका समस्या पहिचान गर्दै अस्पताललाई वर्गीकरण गर्न सरकार लागेको छ । नेपालमा दुई हजार तीन सय चिकित्सक तत्कालै आवश्यक रहेका छन्, यस विषयमा पनि आवश्यक काम गर्दैछौँ”, मन्त्री पौडेलले भन्न्ु भयो ।
रु. छ करोड १२ लाख लागतमा तिलक निर्माण सेवाले उक्त भवन निर्माण गरेको थियो । दुई तले भवनमा साना–ठूला गरी ५३ वटा कोठा रहेका छन् । बिहुँकोट स्वास्थ्य चौकी भवनलाई स्तरोन्नति गरी पाँच शय्याको अस्पताल बनाइएको वडाध्यक्ष बृहस्पति कँडेलले जानकारी दिए । गाउँपालिका अध्यक्ष राजु थापाले गाउँमै गुणस्तरीय स्वास्थ्य सेवा दिन आधारभूत अस्पताल बनाइएको र चिकित्सक राखेर सेवा दिने योजना रहेको बताए । सघन सहरी तथा भवन निर्माण आयोजनाले उक्त भवन निर्माण गरेको हो ।