काठमाडौँ । फागुन २१ गते हुने प्रतिनिधि सभा सदस्य निर्वाचनका लागि काठमाडौं क्षेत्र नं. १ का उम्मेदवार प्रवल थापाले देशमा सुनिने र बोलिने सांसद बन्ने प्रतिबद्धता जनाएका छन् ।
आफ्नो निर्वाचन क्षत्रका मतदाताहरूसँगको संवादमा उनले यस्तो प्रतिवद्धता जनाएका हुन् ।
आफूलाई ‘माटोसँग जोडिएको प्रतिनिधि’का रूपमा प्रस्तुत गरेका थापाले राष्ट्रिय तहमा लोकतन्त्र, सुशासन र राजनीति सुधार पारदर्शिता र जवाफदेहिता प्रबर्धन गर्दै संसदमा सुनिने र बोलिने सांसद बन्ने थापाको दाबी छ ।
राष्ट्रिय राजनीतिमा अपेक्षाकृत नयाँ अनुहार भए पनि स्थानीय जनजीवनसँगको निकटता, पार्टी संगठनमा लामो सक्रियता र समुदायमा निरन्तर उपस्थिति आफ्नो पहिचान भएको उनले बताए ।
संघीय सांसदको भूमिका नीति निर्माणसमेत रहने हुँदा आफूले उद्यमशीलता र स्थायित्व कायम गर्ने सन्दर्भमा नेतृत्वदायी भूमिका निर्माण गर्ने बताए । ‘काठमाडौं क्षेत्र नं. १ सिंगो देशको दर्पण हो’ उनले भने, ‘यो निर्वाचन क्षेत्र ७७ जिल्लाका मानिस र देश विदेशका आँखा पर्ने भएकाले यहाँको विकास र गतिविधिसँग राष्ट्रिय परिचयसमेत जोडिने छ । तीनै तहका सरकारसँगको सहकार्य र समन्वयमा विकास योजना लागू गर्नुपर्ने आवश्यकता छ । त्यसका लागि मैले काम गर्नेछु ।’
यस क्षेत्रलाई राष्ट्रिय नमूना विकास मोडल बनाउने लक्ष्य राखेका थापाले बताए । अन्तर्राष्ट्रिय विमानस्थल र पूर्वी नेपालको प्रवेशद्वार भएकाले यस क्षेत्रको रणनीतिक महत्वलाई ध्यानमा राखेर विशेष योजना ल्याउने एजेण्डा समेत उनले अघि सारेका छन् ।
थापाले आफ्नो क्षेत्रमा वैज्ञानिक ट्राफिक व्यवस्थापन र पार्किङ प्रणालीलाई क्षेत्र केन्द्रित एजेन्डामा समेटेका छन् । त्यस्तै व्यावसायिक सुरक्षा र सुरक्षित आवास क्षेत्र, स्थानीय उद्यमशीलता प्रवद्र्धन (स्टार्टअप, साना व्यवसाय) भित्री बस्तीमा सडक, पैदल मार्ग र सार्वजनिक यातायातको कनेक्टिभिटी, शहरको सौन्दर्यकरण, हरियाली र सम्पदा संरक्षण तथा सुकुम्बासी समस्याको वैज्ञानिक र न्यायोचित समाधानलाई अगाडि सारेका छन् ।
आफ्नो चुनावी घोषणापत्रमा अर्थतन्त्र जोगाउन व्यवसायमैत्री वातावरण, व्यवस्थित शैक्षिक हब निर्माण, स्वच्छ खानेपानी, फोहोर व्यवस्थापन र ढल निकासका कार्यक्रमलाई उनले जोड दिएका छन् । सहरी गरिबी न्यूनीकरणका लागि विशेष कार्यक्रम, सीप विकास, स्वरोजगार प्रवद्र्धन तथा सेवा, पर्यटन र हस्पिटालिटी क्षेत्रको विकासलाई उनले प्राथमिकता दिएका छन् ।
थापाको उपस्थितिले कांग्रेसको विरासत जोगाउन सहज भएको स्थानीय नेता कार्यकर्ताहरूको भनाइ छ । डेढ दशकभन्दा बढी समयदेखि नेपाली कांग्रेसमा सक्रिय रहेका थापा नेविसंघ र तरुण दल हुँदै पार्टीको विभिन्न तहमा काम गरेका नेता हुन् ।
उनले नेविसंघको क्षेत्रीय प्रतिनिधि, महाधिवेशन प्रतिनिधि, तरुण दल केन्द्रीय सदस्य, नेपाली कांग्रेस काठमाडौं जिल्ला कार्यसमिति सदस्य, नेपाली कांग्रेस केन्द्रीय समिति तरुण विभाग सदस्य, महासमिति सदस्य महाधिवेशन प्रतिनिधिलगायत भूमिकामा काम गरिसकेका छन् ।
उनले पार्टीको तल्लो कमिटी र विद्यार्थी संगठनदेखि नै सक्रिय रहेकाले आफू नेपाली कांग्रेसको नर्सरीमा हुर्किएको र माटोलाई बुझेको उम्मेदवार रहेको बताए ।
अष्ट्रेलियाबाट व्यवस्थापनमा स्नातकोत्तर गरेका थापा हाल पारिवारिक हस्पिटालिटी व्यवसाय, सामाजिक काम र राजनीतिमा समानान्तर रूपमा सक्रिय छन् । उनले आफू ‘भाइरल राजनीति’भन्दा ‘ग्राउन्ड राजनीति’मा विश्वास गर्ने बताउँछन् ।
