हेटौंडा । बागमती प्रदेशका मुख्यमन्त्री बहादुरसिंह लामाविरुद्ध दर्ता गरिएको अविश्वास प्रस्तावमाथिको छलफल फेरि अन्योलमा परेको छ। प्रस्तावमा हस्ताक्षर गरेका सांसदहरूको सनाखत प्रक्रिया अघि बढाउन बोलाइएको नेपाली कांग्रेस संसदीय दलको बैठक फेरि स्थगित गरिएको हो।
मंगलबार दिउँसो १ बजेका लागि तय गरिएको बैठकमा प्रस्तावकर्ताहरूको हस्ताक्षर सनाखत गर्ने कार्यसूची तय गरिएको थियो। तर लामा पक्षधर सांसदहरू प्रदेश बाहिर रहेकाले प्रक्रिया अघि बढाउन नमिल्ने भन्दै ती पक्षले आपत्ति जनाएपछि बैठक तत्कालका लागि रोकिन पुगेको हो।
केन्द्रीय नेतृत्वको चापपछि साँझतिर छलफल अगाडि बढाउने प्रयास भए पनि स्पष्ट सहमति नजुटेपछि अन्ततः बैठक स्थगित गरिएको हो।
अब उक्त बैठक भोलि बिहान १० बजेका लागि सारिएको छ। नेपाली कांग्रेसभित्रै अविश्वास प्रस्तावमाथि एकमत नदेखिएपछि बागमतीको सत्ता समीकरण अझै अन्योलपूर्ण बन्दै गएको छ।
