काठमाडौं । बाढीबाट प्रभावित नागरिकको उद्धार, राहत, पुनर्स्थापना तथा पुनर्निर्माणमा सहयोग पुर्याउन नेपाली कांग्रेस बागमती प्रदेश संसदीय दलले विशेष समन्वय समिति गठन गरेको छ ।
रसुवा, नुवाकोट, धादिङ र चितवनलगायत बाढी प्रभावित जिल्लामा आवश्यक समन्वय, व्यवस्थापन तथा सहयोगका लागि ‘भोटेकोशी प्रभावित क्षेत्र पुनर्स्थापना तथा पुनर्निर्माण व्यवस्थापन समन्वय समिति’ गठन गरिएको हो । नेपाली कांग्रेस नुवाकोटका सभापति तथा सांसद रमेशकुमार महतको सभापतित्वमा गठित समितिमा रसुवाका सांसद प्रभात तामाङ, धादिङका सांसद मधुकुमार श्रेष्ठ र चितवनकी सांसद बिनु रायमाझी पौडेल सदस्य रहेका छन् ।
समितिले सरकार, दातृ निकाय, संसदभित्रका राजनीतिक दल, सुरक्षा निकाय तथा प्रभावित नागरिकसँग समन्वय गरी उद्धार, राहत, पुनर्स्थापना र पुनर्निर्माणका काममा सहजीकरण गर्ने जनाएको छ । विपद्को समयमा राज्यका निकायसँग सहकार्य गर्दै प्रभावित नागरिकको आवश्यकता पहिचान गरी तत्कालीन तथा दीर्घकालीन योजना निर्माणमा समेत समितिले भूमिका खेल्ने बताइएको छ ।
समितिका सभापति महतले बाढीका कारण टनेलमा फसेका व्यक्तिको उद्धारमा सरकारी पक्षबाट ढिलाइ भएको भन्दै प्रभावकारी सूचना र समन्वय हुन नसक्दा मानवीय क्षति बढेको बताए । उनका अनुसार टनेल निर्माणका डेभलपरसँग तत्काल सम्पर्क गरी टनेलको अवस्थिति, संरचना र त्यसभित्र रहेका व्यक्तिको संख्यालगायतका जानकारी लिएर उद्धार अघि बढाउन सके थप मानवीय क्षति रोक्न सकिन्थ्यो ।
समितिले बाढी प्रभावित क्षेत्रका बालबालिका तथा नागरिकको गाँस, बास, कपाससँगै शिक्षा, स्वास्थ्य र सुरक्षित पुनर्स्थापनालाई प्राथमिकतामा राख्नुपर्ने निष्कर्ष निकालेको छ। प्रभावित क्षेत्रमा तत्काल राहतसँगै दीर्घकालीन पुनर्स्थापना र पुनर्निर्माणका लागि तीनै तहका सरकारले समन्वयात्मक रूपमा योजना बनाएर अघि बढ्नुपर्नेमा समितिले जोड दिएको छ।
बैठकले बाढी तथा विपद्को समयमा उद्धार तथा राहतमा खटिएका नेपाली सेना, नेपाल प्रहरी, सशस्त्र प्रहरीलगायत सुरक्षा निकाय, स्थानीय नागरिक, निजी क्षेत्र, बैंक तथा वित्तीय संस्था, स्वदेशी तथा विदेशी दातृ निकाय र सहयोगी राष्ट्रप्रति धन्यवादसमेत व्यक्त गरेको छ ।
समितिको बैठकमा नेपाली कांग्रेस बागमती प्रदेश सभापति तथा संसदीय दलका नेता एवं पूर्वमुख्यमन्त्री इन्द्रबहादुर बानियाँको विशेष आतिथ्यता रहेको थियो । बैठकमा समितिले हालसम्म गरेका काम तथा प्रभावित क्षेत्रमा तत्काल गर्नुपर्ने कार्यबारे बानियाँलाई जानकारी गराइएको थियो ।
नेता बानियाँले विपद्को घडीमा प्रभावित नागरिकलाई सहयोग गर्न कांग्रेसका तर्फबाट कुनै कमी हुन नदिने गरी उद्धार, राहत, समन्वय र पुनर्स्थापनाका कार्यमा सक्रियतापूर्वक जुट्न निर्देशन दिएका छन् ।
