रामेछाप । ३२ औँ अन्तर्राष्ट्रिय अपाङ्गता दिवसको अवसरमा मन्थली नगरपालिका ५ सुनारपानिकी अपाङ्ग अधिकारकर्मी निर्मला कार्की सम्मानित भएको छ । राष्ट्रिय अपाङ्ग कोषले ३२ औँ अन्तर्राष्ट्रिय अपाङ्गता दिवसको अवसरमा मङ्सिर १७ गते कार्कीलाई सम्मान गरेको हो ।
काठमाडौँमा आयोजित औपचारिक कार्यक्रमका बिच सङ्घीय सहरी विकास मन्त्री सिता गुरुङले कार्कीलाई ज्योति केसी मेरुदण्ड पक्षघात महिला प्रतिभा पुरस्कारबाट सम्मान गरेको हो । लामो समयदेखि मेरुदण्ड पक्ष घातबाट पीडित निर्मला ह्विील चियर प्रयोग गरेर गाउँमै रहेर शिक्षण पेसामा पनि अब्बल भूमिका निर्वाह गर्दे आएको भन्दै राष्ट्रिय अपाङ्ग कोषले कार्कीलाई सम्मान गरेको कोषले जनाएको छ ।
सो अवसरमा कोषले निर्मला कार्की सहित अपाङ्गता भएका अन्य एक दर्जन अपाङ्गता भएका अरू व्यक्तिहरूलाई पनि सम्मान गरेको थियो । अपाङ्गता भएकै कारण केही पनि काम गर्न सकिँदैन र समाजको अगाडी मनोबल खुम्च्याएर बस्नु पर्छ भन्ने सामाजिक मान्यतालाई चिर्दे अपाङ्गता भएकाहरूका लागि प्रेरणाको श्रोत, आफ्नो गाउँ सुनारपानीको भैरवी माविमा असल शिक्षिका र गाउँमा असल छोरीको रूपमा स्थापित निर्मलालाई कोषले देशभरका अपाङ्गता भएकाहरू मध्येबाट प्रेरित र उदाहरणीय ठहर गरी राष्ट्रिय स्तरको सम्मानबाट सम्मान गरेको हो ।
