काठमाडौँ । आवश्यक कानुनको मस्यौदा निर्माण गर्न बागमती प्रदेशका आन्तरिक मामिला तथा कानुनमन्त्री सुरजचन्द्र लामिछानेले सचिवहरूलाई निर्देशन दिनु भएको छ । मन्त्री लामीछानेले आगामी बागमती प्रदेश सभालाई बिजनेश दिन आवश्यक कानुनको मस्यौदा निर्माणका लागि सचिवहरूलाई निर्देशन दिनु भएको हो ।
मन्त्रालयमा मंगलबार कानुनमन्त्री लामिछानेको अध्यक्षतामा प्रदेशमा आवश्यक कानुन निर्माण सम्बन्धमा बैठक बसेको थियो । मंगलबारको बैठकमा प्रदेशका प्रमुख सचिव हरि लम्साल सहित मन्त्रालयका सचिव, महाशाखा प्रमुखहरू र मन्त्रालयका कानुन अधिकृतहरूको उपस्थिति थियो ।
प्रदेश सरकारका सचिवहरूलाई उहाँले आगामी पुसबाट सुरु हुने पन्ध्रौँ अधिवेशनमा प्रदेशसभालाई बिजनेश दिने गरी आवश्यक कानुनको मस्यौदा निर्माण गर्न निर्देशन दिनु भएको हो । प्रदेश सभाको चौधौँ अधिवेशन १६ असोज मध्यरातबाट अन्त्य गरिएको थियो । पुसबाट नयाँ अधिवेशन सुरु गर्ने तयारीमा बागमती प्रदेश सरकार छ ।
बैठकले केही प्रदेश ऐन संशोधन सम्बन्धी विधेयकको मस्यौदा निर्माणको विषयमा पनि छलफल भएको कानुन मन्त्रालयले जानकारी दिएको छ । संशोधन गर्नुपर्ने ऐनको विवरण र विषय वस्तु यथाशीघ्र उपलब्ध गराउन मन्त्री लामिछानेले निर्देशन दिनु भएको छ ।
मन्त्री लामिछानेले २०७९ मा बागमती प्रदेशमा निर्माण गर्नुपर्ने भनी पहिचान गरिएका कानुनको सूचिको पुनरावलोकन सम्बन्धमा मन्त्रालय मातहतको कानून मस्यौदा समितिलाई बुझाइएको प्रतिवेदनका आधारमा अझै ५२ वटा कानुन निर्माण हुन आवश्यक रहेको जानकारी दिनु भयो ।
जसमध्ये ४१ वटा विधेयक, ४ वटा नीति र ७ वटा नियमावली रहेको बताउनु भयो । मन्त्री लामिछानेका अनुसार प्रदेश सरकारलाई तत्काल निर्माण गर्नुपर्ने ९९ वटा कानुनको पहिचान गरिएको थियो ।