काठमाडौं । इलाम क्षेत्र न–२ मा ४० हजार मत गणना सम्पन्न भएको छ । ४० हजार मत गणना सकिदा नेकपा एमालेका उम्मेदवार सुहाङ नेम्बाङले १६ हजार ९४४ मत ल्याउदै अग्र स्थानमा रहेको छ । नेपाली काँग्रेसका उम्मेदवार डम्बर खड्का ११ हजार २७३ मत ल्याउदै दोस्रो स्थानमा रहेको छ ।
एमाले उम्मेदवार सुहाङ नेम्बाङ काँग्रेस उम्मेलवार भन्दा ५ हजार ६७१ मत का साथ अग्र स्थानमा छ । दोस्रो स्थानमा रहेको कांग्रेससँग तेस्रो स्थानमा रहेको स्वतन्त्र उम्मेदवार डकेन्द्र थेगिमले प्रतिस्पर्धा गरेका छन् ।
२०७९ मंसिर ४ को आम निर्वाचनमा एमाले उम्मेदवार सुवास नेम्वाङसँग ११४ मतको झिनो अन्तरले पराजित कांग्रेस उम्मेदवार खड्काको निकटतम प्रतिस्पर्धीमा स्वतन्त्र उम्मेदवार थेगिम देखिएका छन् । दोस्रो स्थान कायम राख्न थेगिमसँग कांग्रेस संघर्षरत छ ।
खड्कालाई स्वतन्त्र उम्मेदवार थेगिमले ९ हजार ०४४ मत ल्याएर पछ्याइरहेका छन् । गत स्थानीय तहमा जितेका वडा तथा पालिकामा कांग्रेसका उम्मेदवारले पाए अनुसारको मत खड्काले बचाउन सकेनन् । गाउँपालिका अध्यक्ष र अधिकांश वडाध्यक्ष जितेको स्थानमासमेत कांग्रेस तेस्रो स्थानमा पुगेको छ ।
गाउँपालिका अध्यक्ष ६ मध्ये ५ वटा वडाध्यक्ष जितेको चुलाचुली गाउँपालिकामा कांग्रेस तेस्रो स्थानमा खुम्चियो । एमालेले चुलाचुलीमा कुल मत ४ हजार ७४ पाउँदा कांग्रेसले २ दुई हजार ५८६ मत पायो । स्वतन्त्र उम्मेदवारले कांग्रेसलाई पछि पार्दै यस पालिकामा ३ हजार २९९ मत ल्याए ।
माङ्सेबुङ गाउँपालिकामा प्राप्त नतिजाले कांग्रेस थप पछि धकेलिन पुग्यो । स्थानीय तहमा अध्यक्ष, उपाध्यक्ष सहित सबै वडामा पराजित भएको हुँदा तुलनात्मक रुपमा कांग्रेस कमजोर थियो ।
पहिचान पक्षधरको समर्थन पाएका स्वतन्त्र उम्मेदवार थेगिमले ह्वात्तै मत बढाउँदा एमालेसँगको मतान्तर कम भयो स्वतन्त्र उम्मेदवारले कांग्रेसलाई नजिकबाट पछ्याए ।
माङ्सेबुङमा स्वतन्त्र उम्मेदवार थेगिमले कांग्रेस र एमाले उम्मेदवार भन्दा बढी मत पाएका थिए । थेगिमले २ हजार ६३९, एमालेले २ हजार ५९१ र कांग्रेसले १ हजार ४८० मत पाए । यस पालिकाको गणना सकिँदा कांग्रेससँग स्वतन्त्र उम्मेदवारको मतान्तर २०७ मात्रै थियो ।
सुरुवाती मतगणनामा फाकफोकथुमबाट कांग्रेसले अग्रता लिएको थियो । त्यो अग्रता दुईटा वडामा भन्दा बढी रहन सकेन । फाकफोकथुमको वडा नम्बर १, २ मतगणना सकिँदासम्म अग्रता लिइरहेका खड्कासँग मतान्तर नेम्बाङले ३ नम्बर वडामा पुग्दासम्म घटाइसकेका थिए ।
यी तीन वडाको मतगणना सकिँदा डम्बरको १ हजार ६५८ र नेम्बाङले १ हजार ६३० मत पाएका थिए । फाकफोकथुम गाउँपालिकाको सबै मत परिणाम आइसक्दा खड्का १ हजार १५५ मतले पछि परिसकेका थिए ।
एमालेले ४ हजार ४१३ मत पाउँदा दोस्रो स्थानमा रहेको कांग्रेसले ३ हजार २५८ मत पायो । गत स्थानीय चुनावमा गाउँपालिका अध्यक्ष जित्न नसकेको कांग्रेसले १, २, ४ र ७ को वडाध्यक्ष पद जितेको थियो ।
माई नगरपालिकाका वडा नं ६, ७ र ८ बाट पनि कांग्रेसले सन्तोषजनक मत पाउन सकेन । अघिल्लो चुनावमा वडा नम्बर ६ को वडाध्यक्ष जितेको कांग्रेसलाई वडा नम्बर ७ मा पुग्दा स्वतन्त्र उम्मेदवारले पनि पछि पारे ।