रामेछाप । स्वास्थ्य तथा जनसंख्यामन्त्री प्रदिप पौडेल बाढी पहिरो प्रभावित क्षेत्रमा औषधी र स्वास्थ्य सामाग्री लिएर पुगेका छन् । काभ्रेको पनौती नगरपालिका १२ भुमिडाँडामा आवश्यक औषधी र स्वास्थ्य सामाग्री लिएर मन्त्रालयका प्रवक्ता डा. प्रकाश बुढाथोकी सहित स्वास्थ्यमन्त्री पौडेल पुगेका हुन् ।
जनस्वास्थ्य कार्यालय काभ्रे, मेथिनकोट अस्पताल, पनौती नगरपालिका स्वास्थ्य शाखाका चिकित्सक सहितको स्वास्थ्यकर्मीको टोलीले स्वास्थ्य परिक्षण गरिरहेको छ । त्यहाँ रहेको स्वास्थ्य चौकी पनि बाढीले बगाएपछि त्रिपालमा अस्थायी स्वास्थ्य चौकी सञ्चालनमा रहेको छ ।
नेपाली कांग्रेस काभ्रेका सभापति समेत रहेका वाग्मती प्रदेशका पूर्वमन्त्री तिर्थ लामा, पनौती नगर प्रमुख रामशरण भण्डारी, नेपाली कांग्रेस काभ्रेका सचिव माधव ढकाल, गुणराज मोक्तान, प्रवक्ता सन्तमान तामाङ, क्षेत्रीय सभापति चन्द्रबहादुर लामासहित पुगेका मन्त्री पौडेलले उक्त स्थानका लागि आवश्यक स्वास्थ्य सामाग्री सहित आफू आएको बताएका छन् । प्रभावित क्षेत्रमा प्रभावकारी स्वास्थ्य सेवा दिन सरकार प्रतिवद्ध रहेको जनाउँदै आवश्यक थप सामाग्री तत्काल उपलव्ध गराउने प्रतिवद्धता समेत स्वास्थ्य मन्त्री पौडेलले जनाएका छन् । उनले विपदको समयमा पानीजन्य महामारी हुन सक्ने भन्दै त्यसको लागि पनि मन्त्रालयमार्फत सामाग्रीहरु उपलव्ध गराउने प्रतिवद्धता जनाएका छन् ।
