बुटवल । बुटवल–तानसेन सडक खण्ड अन्तगत पर्ने निर्माणाधीन सिद्धबाबा सुरुङ मार्गको माथिल्लो भागबाट पहिरो खसेपछि सिद्धार्थ राजमार्ग अवरुद्ध भएको छ । तिनाउ गाउँपालिका वडा नं–३, दोभानस्थित ड्याम साइड नजिक ठुलो पहिरो खसेपछि आइतबार बिहानैदेखि राजमार्ग अवरुद्ध भएको हो ।
यसअघि पहिरोले एकतर्फी भएको सडकमा माथिबाट पुनः पहिरो खसेपछि राजमार्ग पूर्ण रूपमा अवरुद्ध बनेको दोभान प्रहरी चौकीले जनाएको छ । अहिले सुरुङ मार्ग आयोजना अन्तर्गतको मेसिन लगाएर पहिरो खुलाउने प्रयास गरेको प्रहरीले उल्लेख गरेको छ । ठुला डुङ्गासहित पहिरो खसेको हुँदा सडक खुलाउन केही समय लाग्ने प्रहरीको भनाइ छ । उक्त स्थानमा केही दिनअघि पनि पहिरो खसेको थियो ।
वर्षा हुँनासाथ ढुङ्गा र लेदोसहितको पहिरो खसिरहँदा सवारी आवागमनसँगै सिद्धबाबा सुरुङ मार्ग निर्माणमा समेत अवरोध पुर्याउदै आएको छ ।
बिहानैदेखि राजमार्ग अवरुद्ध हुँदा पहाड र तराईका लागि यात्रामा निस्किएका यात्रुहरू अलपत्र परेका छन् । पहिरो पन्छाएर सडक खुलाउन कम्तीमा दुई घण्टा लाग्ने प्रहरीले जनाएको छ ।